UNA esixe que s'utilice l’INE pa contabilizar les viviendes vacies

|

El voceru de vivienda d’UNA, Daniel Fernández, considera poco seriu'l criteriu del Conceyu pa contabilizar les viviendes vacies de Xixón y pide que s'utilicen los criterios técnicos del INE.

Unidá Nacionalista Asturiana énte les informaciones periodístiques sobre'l númberu de viviendes vacies qu'hai en Xixón, 7.098 según el Conceyu, informa qu'ente les diferentes allegaciones que presentarán al PXO, va esixise la utilización de los criterios técnicos del Institutu Nacional d'Estadística, que tán testaos y comprobaos d'una forma rigurosa, “y non el criteriu de consumu llétricu cero usáu na revisión del plan”.

Pa Daniel Fernández, portavoz de vivienda d'UNA, el cambeú de criteriu pa contabilizar les viviendes vacies na revisión del PXO de Xixón, namás respuenden a un motivu, xustificar lo inxustificable, construir 21.000 viviendes más nuna población que nun medrará perriba de 10.000 persones nos próximos diez años”.

“El criteriu del consumu llétricu cero pa determinar si una vivienda ta vacía ye inoperante porque lleva a qu'una persona que tenga delles viviendes vacies en Xixón, con que pase fines de selmana alternos nellos, esti Conceyu yá nun les considere vacies, lo que ye simplemente ridículo”, indicó Daniel Fernández.

UNA esixe al Conceyu qu'emplegue criterios testaos y comprobaos como son los del Institutu Nacional d'Estadística que “combinen la encuestación directa colos datos del padrón, lo que fai que los sos resultaos seyan abondo más fiables que la estravagancia que ta planteando'l Conceyu”.

Amás, “los sos criterios y sistemes metodolóxicos son públicos, lo que permite un análisis muncho más fondu y garantiza la so comparabilidá con otres zones del Estáu, lo que suponen unos datos básicos pa tomar determinos con criterios racionales y razonables”

D'esta manera, los datos del INE del 2001, indicaben qu'había 13.950 viviendes vacies en Xixón, “lo que fai muncho más plausibles los datos de 19.734 viviendes desocupaes que s'indicaben nel anterior PXO enantes de que se declarare nulu, que les 7.098 que se diz agora na revisión del mesmu”.

Daniel Fernández señala que “nel mesmu censu de 2001, se indica la existencia de 201 edificios ruinosos y de 380 en mal estáu, lo que crea una importante bolsa d'edificabilidá, porque güei en día'l so númberu sedrá mayor, ensin falta d'enantar les llendes de la zona urbana de Xixón”.

Daniel Fernández concluyó que “PSOE ya IU siguen ensin plantease una política de vivienda sostenible, basada na necesidá de vivienda y non na especulación, sacando al mercáu inmobiliariu toles viviendes vacies, edificios ruinosos y solares edificables existentes a día de güei, en cuenta de siguir la invasión de la zona rural”.

 

Contador Estadistiques