El FID’O puxa pa ser Fiesta d’Interés Turísticu

El Bloque por Asturies apoya la petición del conceyu de Tapia y de la organización del Festival Intercéltico d’Occidente, pa que seya declaráu Fiesta d’Interés Turísticu Rexonal.

La organización del Festival Intercéltico d’Occidente yá univó la so petición a la Conseyería de Cultura y Turismu pa que se declare’l Festival como Fiesta d’Interés Turísticu Rexonal. Al empar, la Banda de Gaites d’Occidente entamó una campaña de recoyida de firmes p’afitar el sofitu popular a la iniciativa, pel momentu yá algamaron 200 robles nel primer día.

“Esti ye un de los referentes culturales del occidente asturianu y lleva catorce años trabayando p’averar la cultura a Tapia apoyando a los grupos asturianos, por eso diba ser una pena que se perdiera pola falta d’apoyu del Gobiernu que-yos dexó la subvención a la metá al tiempu que marafundia miles y miles d’euros n’actuaciones que nun representen a la cultura asturiana y namás beneficien a los sos promotores”, señalen.

Segú informa’l Bloque, el presupuestu del Festival anda pelos 50.000 euros, “que ye muncho pa la organización, pero mui poco pal gobiernu asturianu viendo los planes y negocios que tien pa La Llaboral y pal día d’Asturies”.

Pa los nacionalsites, les declaraciones del señor José Luis Moreno son un insultu pa los contribuyentes  y los profesionales asturianos al dicir qu’equí hai sitiu pa venti productores como él.

“La realidá ye que los profesionales asturianos tán indignaos, y con razón, y los negocios namás son pa unos pocos como el señor José Luis Moreno que se reune a escondíes con Álvarez Areces a arreglar lo d’ellos. Esperemos que’l modelu nun sea’l mesmu que’l que siguió’l señor José Luis Moreno en Baleares”, apunten pa finar.