El PP critica que Llaboral pase "de la vanguardia a La Pantoja"

Los diputaos del PP Emilio Pérez y Elma Alonso criticaron la torna plasmante" na programación de Llaboral Escena, que pasó n'agostu "de la vanguardia más intensa a La Pantoja".

Nuna rueda de prensa ufiertada na Xunta Xeneral del Principáu, Alonso esplicó que l'equipamientu recuperó namás un 16 por cientu de lo gastao en 2008 cola venta de localidaes y un 12 por cientu en 2009. Nesti sentíu, aseguró que la recaudación de 2010 -de la que nun-yos fueron facilitaes les cifres- "debe ser muncho peor".
  
Na so opinión, la relación completa d'espectáculos, localidaes y recaudaciones de Llaboral dende'l 29 d'abril hasta'l 4 de xunetu, contien datos "inverosímiles y absurdos" como l'asistencia de más de 9.000 persones al espectáculu La Caxa Negra, de Daniel Aschwanden y Peter Stamer, y de menos de 60 a tres actuaciones de los díes 28 y 29 de mayu.
  
Amás, los 'populares' indicaron que nesti periodu lleváronse a cabo estrozos de materiales "que dexaron ablucaos a los arquitectos" y que'l centru utilizóse como "un abellugu pa familiares y amigos, con xornales altos y falta de tresparencia". "Traxéronse obres percares, ensin nenguna cohesión colos intereses de los asturianos", sorrayó.
  
Nesta mesma llinia, Alonso acusó les actitúes prepotentes y farruques" de los responsables del centru, ente los que citó a García Calvo, actual xerente de Recrea, y a Mateo Feijoo, ex director artísticu del teatru, que se foi colos bolsos llenos ensin que naide -y pidiera esplicaciones".
 
POZU ENSIN FONDU
  
Pela so parte, Pérez Cueva refirióse a Llaboral como "un caprichu obsesivu" del presidente del Principáu, Vicente Álvarez Areces, y los responsables de Cultura, y "una poza ensin fondu onde tirar el dineru de toos".
  
El diputáu llamentó la falta de coherencia que supunxo sustituyir drásticamente un proyectu "de referencia internacional" por otru "nel estremu opuestu", pa ufiertar "un productu mercantil", onde los productores van cobrar a razón de les taquilles y que nun van poder fundir a les empreses asturianes.
  
Amás, al so xuiciu, la nueva programación, que amosó ayeri'l productor madrilanu José Luis Moreno, avérase a la de los Teatros Xovellanos de Xixón y Campoamor d'Uviéu, ésta última "tan criticada pol PSOE".
  
Por too ello, solicitó que s'eviten los espectáculos minoritarios y elitistas", que "nun fueron conocíos nin reconocíos" y "que s'atope un permediu ente lo d'antes y lo d'agora", con un tratu preferente" pa los profesionales asturianos.
  
Tanto Elma Alonso como Pérez Cueva alvirtieron de que van tar vixilantes por que la Ciudá de la Cultura nun torne a selo tamién de los espilfarros" y anunciaron que van solicitar la compaecencia nel Parlamentu de la Conseyera de Cultura, Merced Álvarez, y l'actual responsable de Recrea, Alejandro Calvo, por que quieren que xustifiquen el cambéu, los costos, y los criterios pa la selección de la empresa de José Luis Moreno.