El Bloque súmase a la concentración pola paralización de La Espina

El Bloque súmase a la movilización del próximu miércoles entamada por COAG y los vecinos de la zona suroccidental polos retrasos de la obra de l’Autovia de La Espina.

La organización diz entender la rabia y la impotencia de los vecinos de la zona pola “tomadura de pelo” del ministru de fomentu José Blanco na so última visita a Asturies y el “silenciu cómpliz” del Principáu, “al que paez qu’Asturies y los asturianos ye lo que menos-yos importa”.

“L’anuncia del retrasu y la falta de dineru y plazos pa resolver una comunicación vital ye seguramente una de les peores noticies que se nos podía dar agora pal futuru de la zona y el so desenvolvimiento económicu”, afirmen los nacionalistes.

El Bloque camienta qu’Asturies tien una obligación moral y histórica cola zona suroccidental. “La xente que vive ellí son persones que tienen les mesmes obligaciones que’l restu de los asturianos, anque a la hora de falar de los sos derechos, na práctica y a la hora la verdá, nun son los mesmos que los del restu de la xente del nuestru territoriu”, señalen.

Pa finar, la formación anima a los alcaldes de la zona a que, por una vez, rompan cola disciplina de los sos partíos y nun tengan mieu de ponese al llau de los intereses de la xente que representen, “que nun entienden la marxinación que sufren por intereses ayenos a ellos”.