Falanoncaduca entama a grabar el so discu debú ‘Tiempu de povisa’

La banda de rock n’asturianu Falanoncaduca ta acabantes d’entrar nos estudios ACME d’Avilés pa grabar ‘Tiempu de povisa’, el so debú discográficu.

Baxo la producción de Miguel Herrero y la edición d’Algamar Producciones, esti trabayu va tar formáu por un total de trece cantares nos que la moza formación afita’l ‘Mecigayu son’, etiqueta qu’autodefine’l so eclécticu estilu musical.
 
Rock, Ska, Surf, Reggae, Folk… son dalgunos de los soníos presentes en ‘Tiempu de povisa’, discu que va ser una carta de presentación de llarga duración y, a la par, una muestra de la evolución de Falanoncaduca a lo llargo de los sos tres años de trayectoria.
 
‘L’aldaba’, ‘Sáca-yos la llingua’, ‘Progresa adecuadamente’, ‘La so galbana’, ‘Ánxeles de la guardia’, ‘Pola Carretera’, ‘La flor del agua’, ‘En clave americana’, ‘F.E.P’, ‘A les rexes d’una cárcele’, ‘Puxarra’ y ‘Sele sound system’ son los trece cantares del discu. No cincante a les lletres, con abondes esbilles d’estremaes obres lliteraries asturianes, la banda caltién el tonu reivindicativu; sicasí hai tamién testos con temes y tonos más desenfadaos y irónicos.

Esti trabayu entamó a grabase’l llunes 16 d’agostu nos estudios ACME con Miguel Herrero como productor musical y, anque nun hai fecha nidia, asoleyará hacia mediaos de setiembre. Algamar Producciones ye’l sellu discográficu que va editar el discu, mientres que’l diseñu cuerre a manes del artista gráficu Lezink.
 
Señalar tamién que ‘Tiempu de povisa’ va salir a la cai con llicencia llibre Creative Commons, daqué polo que puxen cada vez más grupos asturianos al non compartir la política de la SGAE.

Tres años d’historia

Falanoncaduca ye una de les bandes más nueves del llamáu Rock Astur. Nacida en 2007 de la unión de dellos músicos mozos de L.lena, Uviéu y Xixón, lleven dende eses feches percorriendo estremaos escenarios de dientro y fuera d’Asturies.
 
En xineru de 2009 sacaron 'En llingua afilada', primera maqueta de seis temes onde presentaben un soníu ska-fusión y unos testos combativos; camín musical que con ‘Tiempu de povisa’ van siguir caleyando.