TPA tresmite misa n'asturianu dende Sariegu

TPA emite mañana, 15 d'agostu, los actos de les fiestes de San Pedrín de la Cueva, en Sariegu, consideraes d'interés turísticu: la misa n'asturianu y la demostración de deporte del país.

María Blanco va comentar, a partir de les 11:30, la celebración cola Baxá del santu en procesión dende la capiya de la parroquia hasta la Cueva de San Pedrín. Darréu, a les 12:00, el párrocu de La nuesa Señora de la Mercé d'Uviéu, José Manuel García de Jesús, va oficiar una misa n'asturianu cantada pol coru Santiaguín, que va cuntar colos comentarios de José María Fernández Antón, presidente de l'Asociación de Festexos de San Pedrín de la Cueva.
 
TPA va retresmitir de siguío, a partir de les 13:00, la demostración de deporte rural asturianu. El corte de tueru, el corte n'altura, el corte con motosierra, el tiru al palu y la carrera de llecheres van ser dalgunos de los deportes d'anguaño.
 
La presentadora del programa va cuntar cola collaboración de José Álvarez González, presidente del Grupu deportivu 6 conceyos’, el que va comentar toos los detalles de l'amuesa. Los dos actos de les fiestes de San Pedrín de la Cueva van emitise per Internet pa tol mundu al traviés de la web www.rtpa.es.