El Principáu defende la programación del Día d'Asturies

El director xeneral de Turismu y Patrimoniu Cultural defendió la organización del Día d'Asturies y la Llaboral. Amás, llamentó les "elucubraciones malintencionaes ensin nenguna base sólida".

José Luis Vega fixo estes manifestaciones nuna rueda de prensa ufiertada n'Uviéu, na que tuvo acompañáu pol xerente de la sociedá pública Recrea, Alejandro Calvo y el coordinador de la organización del Día d'Asturies, Gonzalo José Alonso Huerdo.

Respectu al Día d'Asturies, que se va celebrar a empiezos de setiembre en Ribesella, esplicó que la novedá d'anguaño ye la gala, cola que se va escorrer "potenciar Asturies fuera de les sos fronteres". Va Durar hora y media y va ser retresmitida pola televisión pública asturiana, TPA y emitida per televisiones d'otres comunidaes autónomes.

El presupuestu del Día d'Asturies ye de 400.000 euros, anque nun ta incluyida'l costu la gala nel mesmu. Vega dixo que va haber artistes asturianos na gala, y que dos de les tres productor que la realicen son asturianes. La gala televisiva ye resultáu d'un alcuerdu ente la Forta al traviés de la productora de José Luis Moreno.

En principiu, ta previstu qu'actúe na mesma Isabel Pantoja, anque Gonzalo José Alonso Huerdo señaló qu'entá nun ta confirmada, al igual que'l restu de los artistes y que sigue sometida a les negociaciones pertinentes.

Polo que respecta a Llaboral, Vega señaló qu'anguaño se decidió "dar un xiru" a la programación p'ampliar la ufierta a un públicu diversu, afaciéndose a "los gustos mayoritarios". Afirmó qu'en xunu foi convocáu un concursu públicu p'actividaes y espectáculos, nel que'l Gobiernu del Principáu pon los espacios y los medios esistentes "y los únicos qu'arriesguen son el promotores privaes".

A esa convocatoria de xunu presentáronse diez empreses, la metá asturianes, qu'ufiertaron 176 espectáculos. Asina se ta iguando hasta avientu una ufierta variada y calidable". Na primera quincena de setiembre presentaráse la programación del últimu trimestre del añu, na que nueve empreses van desenvolver 22 espectáculos.

El xerente de Recrea, Alejandro Calvo, esplicó qu'ocho espectáculos de los proyectaos esti branu correspuenden a una productora de José Luis Moreno. "Nun ye casual, sinón que respuende a que ye la única empresa capaz de programar nel patiu; pero nun supon un gastu de nengún euru para Recrea", apuntó. Ende ta incluyíu l'espectáculu 'Asina ye la vida', d'Isabel Pantoja o 'El Show de los Lunnis'. Los espectáculos escoyéronse porque son los que meyor s'afayen a les necesidaes, añedió Vega, que dixo que nun ta esmolecíu n'absolutu por que sían xestionaos por José Luis Moreno.

Alejandro Calvo dixo que la programación de Llaboral nun busca restar nada, sinón que lo que se pretende ye "sumar". Asina, señaló que desenvolver grandes espectáculos con "indiscutible interés pal públicu" nun resta capacidá por que Llaboral sía un referente cultural" pa toles disciplines de les artes. "Vamos a un modelo más comercial, de atrayer públicu", reconoció sicasí.