Colunga acueye la V Muestra d'Artistes pola Oficialidá

La Casa de Cultura de Colunga,  va acoyer ente los díes 18 y 30 d'agostu, la V Muestra d'Artistes Asturianos pola Oficialidá del Asturianu, cedida temporalmente pol CAO.

Trátase d'una esposición que cuenta cola collaboración del Serviciu de Normalización Llingüística de la Comarca de la Sidra, que va más allá del interés artísticu, y qu'inclúi "un posicionamientu de los artistes asturianos a favor de los derechos llingüísticos", según informaron los organizadores nuna nota prensa. "Les persones que participen tán pol llabor de que se reconoza la oficialidá del asturianu y gallego-asturianu como un derechu ciudadanu básicu: la posibilidá llegal d'usar la llingua propia en cualquier ámbitu de la vida", maticen.

Ente los espositores, figuren Fernando Alba, Berto Peña, Nel Amaro, Maite Mentol, Charo Visos, Beatriz Corredoira, Pablo Maojo, Alejandro Mieres, Ricardo Mojardín, Neto, Ánxel Nava, Ástur Paredes, Vicente Pastor, Bernardo Sanjurjo, Cuco Suárez o Guillermo Simón.
  
"Son una parte más de la sociedá civil que ve con bonos güeyos la recuperación y normalización del patrimoniu llingüísticu d'Asturies", añade la nota.
  
La muestra axunta a artistes de tolos enclinos y edaes que, como espresión de compromisu donen estes obres al CAO p'ayudar nes sos campañes de reivindicación. La esposición ta coordinada pol Foru Arte Ciudá que participa nel CAO ente más de 250 asociaciones civiles. La inauguración va tener llugar el miércoles, 18 d'agostu, a les 13.00 hores.