Los precios baxen siete décimes en xunetu n'Asturies

L'Índiz de Precios al Consumu (IPC) baxó siete décimes en xunetu en comparanza col mes anterior, y la tasa interañal quedó nel 2,1%, cuatro décimes superior a la de xunu pasáu.

Nel conxuntu del Estáu, los precios aumentaron cuatro décimes, y fixaron la tasa interañal nel 1,9%, el valor más altu dende payares del 2008, cuando algamó'l 2,4%, según informó l'Institutu Nacional d'Estadística (INE).
  
El descensu del IPC mensual debióse, principalmente, al vistíu y el calzáu, precios que baxaron un 11,7% n'España y un 13,2% nel país, comportamientu propiu de la temporada de rebaxes. Tamién repercutieron na baxada mensual del IPC los precios d'artículos domésticos, que baxaron cinco décimes na Comunidá Autónoma. Pela so parte, el capítulu de 'otros', rexistró una cayida mensual de cuatro décimes.
  
Sicasí, el restu de grupos rexistró subíes, siendo la mayor la d'ociu y cultura, que repicó un 1,7% debíu a la subida de los precios del viaxe organizáu. Tamién incidió la vivienda, qu'aumentó en xunetu un 1,3% en comparanza col mes anterior, pol encarecimientu del gas y la eletricidá. Subieron tamién los precios d'hoteles, cafés y restoranes, un 1%.
  
En menor midida subió'l tresporte, un 0,6%, repique que l'INE achaca a la subida de los precios de tolos sos componentes, nun siendo carburantes y llubricantes. Tamién un 0,6% subieron los precios en Medicina n'Asturies.
  
Les comunicaciones, y les bebíes alcohóliques y tabacu subieron mediu puntu, mientres que los precios d'alimentos y bebíes non alcohóliques subieron dos décimes. N'Enseñanza, sicasí, los precios nun variaron.
    
Por comunidaes, el mayor descensu del IPC en xunetu prodúxose en Ceuta con un 1,6 por cientu y en Melilla col 1,4 por cientu. De siguío, La Rioxa con un puntu menos, siguíu de Murcia con ocho décimes menos. Un 0,7 por cientu baxaron los precios n'Asturies, Castiella-La Mancha, Galicia y Estremadura.