Buendía diz al so sociu de Gobiernu que la incineradora sigue alantre

El conseyeru d'Infraestructures aseguró que la incineradora sigue alantre y vinculóla a otres iniciatives de Conxersa, como la reutilización de llodos o la biometanización.

Ye más, afirmó que confía en que se puea licitar este mesmu añu, con un presupuestu que va rondar los 250 millones d'euros. Francisco González Buendía, en respuesta a los medios de comunicación mientres la so visita al stand de Coxersa na Feria Internacional de Muestres d'Asturies, apuntó que la licitación de la planta de valorización enerxética nun ta afectada porque haya crisis, dao que ye un proyectu necesariu. Coles mesmes, indicó que s'enmarca nuna licitación global que se va a facer antes qu'acabe l'añu.
  
L'actuación que se va executar del conxuntu de los terrenes del centru de Zoreda, onde ta Coxersa, nun ye p'ampliar la capacidá del vertederu, que recordó tien llende nel 2015.
  
Pela contra, esa ampliación tien que ver cola ubicación d'aquelles instalaciones yá anunciaes que van permitir reducir la fracción restu, que ye lo que va dir a la incineradora. Auméntase poro, según él, la superficie de tratamientu integral de residuos, al traviés de la biometanización, la planta de llodos esperimental y otros.
  
Amás, calcó en que la financiación de la incineradora nun va suponer un esfuerzu estra a los conceyos. "Yá ta tou faláu y lo dicho antes val agora", calcó antes de repitir que s'avanza "pasu a pasu" nesti proyectu.
  
Nesti sen, señaló que nun hai nenguna novedá sobre la incineradora y reprochó al so sociu de Gobiernu del PSOE nel Principáu que tenga "mala memoria" si piensa que la construcción de la incineradora ta olvidada.