El Gobiernu esclarará a EEXX que la cooficialidá "funciona bien"

Zapatero anunció que'l Gobiernu va enviar un "completu informe" al Departamentu d'Estáu de los EEXX pa "esclarar" que n'España esiste una "convivencia llingüística" ente'l castellán y el catalán, asina como naquelles Comunidaes onde hai una cooficialidá, dalgo que "funciona razonablemente bien".

Tres reunise col rei, Juan Carlos, nel Palaciu de Marivent de Palma, Zapatero calcó en que nun ta "mui d'acuerdu" col últimu informe añal sobre la situación de los derechos humanos ellaboráu pol Departamentu d'Estáu de los EEXX, que recueye la "vulneración de los derechos llingüísticos" que, al so xuiciu, produzse en Cataluña y Baleares, onde considera qu'hai una discriminación" por motivos de llingua.

"Nun digo que nun haya un fechu concretu o singular que puea pertubrar el respetu a los dos llingües, pero siempre tuve la percepción y la tresmisión per parte de los ciudadanos de Baleares y Cataluña de que la convivencia llingüística funciona bien pa la inmensa mayoría", sorrayó.
  
Nesti sen, Zapatero defendió que "nun hai problemes fundamentales" de convivencia ente'l castellán y el catalán nes citaes Comunidaes Autónomes y, por ello, calcó en que l'Executivu central ta dispuestu a treslladar al Departamentu d'Estáu de los EE.UU un informe nel que se demuestre esto.
  
Sicasí, reconoció que "esta convivencia" nun quier dicir que nun haya o puea haber un casu concretu nel que puea "vulnerase" el "equilibriu natural" ente les dos llingües, pese a que calcó en qu'esto "foi la escepción", teniendo en cuenta que "la regla ye que la inmensa mayoría de los ciudadanos de Baleares y Cataluña viven con naturalidá esa convivencia".
  
Asina, Zapatero remarcó que los ciudadanos "respeten" a una y otra llingua y aseveró qu'igual qu'él "aprecia" la so llingua materna, que ye'l castellán, pola que siente "la impronta de defendela", entiende que l'idioma maternu de munchos ciudadanos de Cataluña y Baleares ye'l catalán y, poro, entiende que "tengan la mesma actitú de defensa mesma de la so llingua".
  
Nesta llinia, el presidente del Executivu dixo qu'esta situación "pue entamase, tal como ficimos razonablemente bien estes últimes décades".
  
Por esta razón, manifestó que'l Gobiernu pretende facer "alguna aclaración" del informe de los EEXX, al considerar que cualquier otru ángulu dende'l que s'analice la situación de les llingües n'España "de normal suel tar desenfocáu, al respecto de lo que vivimos y de cómo pue vivise nel futuru, que ye lo qu'importa".