Solidaritat Catalana encamienta a los partíos independentistes que s'unan

Solidaritat Catalana encamentó a los partíos independentistes a convocar una asamblea'l 4 de setiembre pa escoyer democráticamente les llistes d'una candidatura unitaria.

D'esta manera, Solidaritat Catalana, el partíu creáu y lideráu pol ex presidente del FC Barcelona, Joan Laporta, fixa la fecha pa formalizar una unión de los partíos independentistes de cara a les elecciones catalanes de seronda que s'antoxa difícil, puesto que dende ERC nun se contempla la posibilidá d'acudir a los comicios en coalición col partíu lideráu por Laporta.

Asina, la duda ta en si a lo último Solidaritat Catalana y Reagrupament, el partíu lideráu pol ex conseyeru Joan Carreteru, van algamar un acuerdu y van acudir xuntos a les elecciones.
  
Nun decálogu fechu públicu por Solidaritat Catalana, la formación independentista repitió que los simpatizantes del partíu van escoyer quién forma parte de les llistes, nun se van llendar a ratificar la llista presentada pola dirección, y afalaron al que quiera sumase al so proyectu a aceptar esi funcionamientu.
  
Nel decálogu, el partíu lideráu por Laporta establez los sos oxetivos y espón el so compromisu de nun pactar con partíos que nun tengan como oxetivu proclamar la independencia de Cataluña na próxima lexislatura y sometela a referéndum.