Chus Pedro ufre un recital na UABRA

El próximu martes 10 d’agostu, la Universidá Asturiana de Branu acueye un recital de Chus Pedro, excomponente de Nuberu, acompañáu por Gabino Antuña.

El conciertu ta inxertáu dientro de les Actividaes Abiertes de la UABRA, y va entamar  a les 22:30 hores nel Teatru Toreno de Cangas. Esta nun ye la primer actividá musical de la Universidá Asturiana de Branu, yá’l pasáu sábadu'l grupu Falanoncaduca ufrió un conciertu na discoteca Zayco de Cangas, asitiada a la vera de la Escuela-Hogar qu’acueye a los 150 alumnos.

Amás, la UABRA, como actividaes complementaries, yá entamó una exposición d’Adolfo Manzano, ‘Pequeñes nubes nel cielu, nel xardín xuxurios’; una charra sobre’l cancer a cargu de Xosé Antón Suárez Puente, profesor de la Universidá d’Uviéu; la presentación de Ḷḷumés, el primer vinu etiquetáu n’asturianu; y la representación de la obra ‘El criáu de dos amos’, a cargu de Nun Tris.

Estes nun son les úniques actividaes que tán teniendo llugar estos díes en Cangas. Amás de les actividaes empobinaes pola dirección de la UABRA o’l propiu Conceyu, los 150 alumnos de los cursos tán faciendo actividaes extra escolares, toes elles más dirixíes a la folixa.

Dende sorteos de productos de la Xunta Moza, una nueche d’entroido, una espicha con música y cantares del país, una chiculatada o, mesmamente, sesiones de discoteca con música n’asturianu, son dalgunes de les actividaes entamaes polos propios alumnos