El BA califica de "escándaloses" les actuaciones del Día d'Asturies

El Bloque por Asturies consideró "totalmente escandaloses" dalgunes de les actuaciones previstes pol Principáu pal Día d'Asturies que se va celebrar esti añu en Ribeseya.

"Ye una burlla cruel a los asturianos, a los ciudadanos de Ribeseya, que mientres acaben con polítiques sociales, retáyense sueldos y empleos y esaníciense ayudes a families con fíos discapacitaos, el Gobiernu del Principáu contrate a artistes como Isabel Pantoja, Sergio Dalma, Chenoa, Tamara y Nacho Cano esbardiando'l dineru n'actuaciones que nada nuevo apurren a los turistes y braniantes que s'averen a la nuesa tierra a conocer el nuesu arte, cultura ya identidá", sostien.

Na so opinión, el Gobiernu del Principáu "estroza la oportunidá de atrayer a turistes y braniantes, de proyectar Ribeseya y Asturies, cola programación d'actuaciones que podríen vese en cualesquier otra parte, ensin entender que el que visita la nuesa comunidá busca conocer propuestes nueves que nun atoparíen n'otres partes del Estáu".
 
Pa l'agrupación, el Gobiernu del Principáu "cai nuevamente nel paletismo ensin fronteres que la caracteriza esbardiando dineru que nun hai na contratación d'actuaciones cares que nada nuevo apurren y que vienen facer el so agostu en setiembre".

El Bloque por Asturies considera que se pierde amás la oportunidá de potenciar y dar conocer l'arte y la cultura asturiana, y de sofitar nesta dura dómina de crisis a artistes y grupos asturianos.  

Amás, al so xuiciu, "la gala na TPA va convertise nuna representación casposa, tresnochada y mediocre, que tresllada una imaxe d'Asturies falsa y aburuyada al restu d'España".
 
A lo último, el Bloque tien claro que nesti Día d'Asturies los artistes asturianos y la ciudadanía de Ribesella "van tener que facer un esfuerzu extra p'amosar la verdadera realidá d'Asturies". "A lo menos ye l'últimu Día d'Asturies qu'entama esti Gobiernu y entá siquier que se celebra solamente una vegada al añu", conclúi.