La Pantoja, Chenoa o Rosa; grandes actuaciones del Día d’Asturies

El Presidente del Principáu, Vicente Álvarez Areces, presentó na Feria de Muestres los actos del Día d'Asturies. Isabel Pantoja, Chenoa, Rosa o Soraya, son dalgunes de les actuaciones.

El Día d’Asturies va celebrase en Ribeseya ente'l 4 y el 8 de setiembre. El Gobiernu asturianu espera superar los 500.000 visitantes tres l'ésitu alcanzáu nos dos anteriores ediciones, que s'entamaron en L’Entregu y Cuideiru.

Según esplicó Areces, Ribeseya suma "sabor y tradición asturianes" y ye amás "una potencia turístico y cultural que va poner lo meyor de sigo mesma pa recibir a los miles de visitantes que se van averar hasta les sos cais pa esfrutar d'un programa d'actividaes realmente estraordinariu". Esta y otres iniciatives demuestren, según Areces, "el verdaderu apueste del Gobiernu por convertir Asturies nun polu d'atracción artística y musical, cuantimás mientres el branu".

El programa festivu va arrincar el día 4 col corte de la cinta inaugural y el restallón. Conciertos, degustaciones gastronómiques, mercáu tradicional, amueses culturales y deportives, espectáculos audiovisuales y actividaes folklóriqus, ente otres, van completar el programa.

A día de güei, yá hai confirmaes más d'una ventena d'actuaciones musicales ente artistes asturianos y de primer nivel estatal. Ente los conciertos yá confirmaos cabo destacar los de Sergio Dalma, Chenoa, Isabel Pantoja, Rosa, Daniel Diges, Tamara, Soraya, Innocence, Mirko (ilusionista) y Mercadance (Nachu Cano). Tamién va tar en Ribesella lo meyor del panorama musical asturianu, como'l Coru La Fuentina, Lilián de Celis, Xideces, Llacín, Spanta la Xente, Corquiéu, Pablo Moru, Apoderó, Manolo Penayos, l'Orfeón de Mieres, Xera.

Areces anunció amás que la televisión autonómica va tener anguaño "un papel más activu nel espardimientu de los actos del Día d'Asturies". Amás de los informativos, l'ente públicu tien previstu aconceyar a dellos artistes nuna gala musical que va retresmitir dende Ribeseya pa toa Asturies y que tamién s'emitirá’l traviés de les televisiones autonómiques axuntaes na  Forta. Gracies a esti alcuerdu, tamién va recibir los derechos d'emisión de les gales autonómiques que tán entamando estes comunidaes pa próximes feches.

MEDAYES D'ASTURIES

Dientro de los actos oficiales, l'Auditoriu Príncipe Felipe d'Uviéu va acoyer el próximu 7 de setiembre la entrega de les Medayes d'Asturies coles que se reconoz l'esfuerzu, la valía y la solidaridá amosaos por un nutríu grupu d'asturianos.
 
Anguaño les medayes d'oru recayeron en José María Martínez Cachero, a títulu póstumu; y el  sindicatu SOMA-FIA-UXT na celebración del so centenariu. Les distinciones de plata son pa el ex árbitru de fútbol Manuel Mejuto González; el Biesca Xixón H.oquei; el grupu TSK; la empresa Valle, Vallina y Fernández; la Federación Internacional de Centros Asturianos (FICA); y la ONG Una ciudá pa toos.