“Toros” de Xovellanos

L'actor Toño Caamaño dramatizará el testu “Toros” de Xovellanos, alredor de la Plaza d'El Bibio esti domingu 8 d'agostu a les 18:30 hores.

Unidá Nacionalista Asturiana de Xixón al traviés de la so vocera Yolanda González, convocó a la ciudadanía a recordar el movimientu antitaurino de la ciudá y d’Asturies, esti domingu 8 d'agostu na redoma de la plaza de toros d'El Bibio a les 18:30 hores, coincidiendo col primer festexu taurín de la Feria de Begoña.

Yolanda González recordó que “el movimientu antitaurino siempre tuvo vivu na ciudá dende'l mesmu Xovellanos, que foi unu de los grandes defensores de la so abolición per parte de Carlos III”, y foi unu de motores d'importantes movilizaciones que consideraben el toréu “una práctica primitiva, cruel y ensin sentíu y que en nengún casu representa a la ciudadanía de Xixón nin d’Asturies”.

Dende UNA tamién queremos “recordar la fiesta antitaurina entamada en 1914 pola Sociedá Antiflamenquista Cultural y Protectora de los Animales y les Plantes, qu'axuntó a miles de persones al rodiu de l'abolición de los festexos taurinos” porque para UNA ye importante destacar que “na llucha de los derechos de los animales Xixón siempre foi un referente y nun puede dicise que se trate d'un fenómenu nuevu o estravagante, yá que ta n'el mesmu ADN de la nuesa ciudá, que nunca asumió práctiques tresnochaes y de violencia gratuita contra los toros” concluyó Yolanda González.