Inxenieríes alerten sobre l'impactu de los recortes presupuestarios

El presidente de Tecniberia Asturias, Carlos Escanciano, dixo que la reducción na inversión pon en peligru la estabilidá d'un sector que n'España da empléu a 200.000 inxenieros.

El presidente de  l'asociación qu'arrexunta empreses d'inxeniería, consultoría y servicios técnicos del país, calificó de "decisivu" l'actual momentu del sector a escala nacional.  No que va del 2010 la licitación pública d'inxeniería redúxose a la metá en comparanza col 2009, y la previsión pal 2011 prevé una caída tovía más intensa. Un recorte que Tecniberia califica de "inxustamente desproporcionáu" en relación al aplicáu n'otres inversiones públiques.
  
De caltenese esi enclín, según el so diagnósticu, múltiples empreses veríense conducíes al zarru y miles d'inxenieros perderíen el so empléu, lo que, en palabres del presidente de l'asociación, podría causar "daños irreversibles" a la inxeniería española. Aceptando la necesidá de recortar el gastu públicu, ésti nun tendría que ser escesivu pa esti sector, manifestó, porque España gasta poco n'inxeniería (menos del 5% del total de la inversión).
  
Escanciano defende la necesidá d'una inxeniería que "racionalice técnicamente les decisiones públiques" y contribuya a meyorar la situación económica española. Según los cálculos de Tecniberia, una meyor ordenación del territoriu permitiría reducir los sobrecostos enerxéticu y medioambiental nel tresporte de mercancíes y aforrar sobre 300.000 millones d'euros al añu.
  
Tecniberia anima a les alministraciones públiques a reforzar la marca d'España" na Inxeniería, como símbolu de calidá, desarrollu tecnolóxicu y innovación de cara al esterior, al empar qu'encamienta que se destine a inversión pública a nuevos sectores con proyección pa la inxeniería, como por casu la cooperación al desarrollu.