L'ataque contra Ahmadineyad foi namás un petardu

|

Fontes presidenciales iranínes desmintieron que'l presidente del país, Mahmud Ahmadineyad, sufriere un atentáu nel oeste d'Irán, según informó la televisión estatal.

Les fontes aseguraron qu'estes informaciones son "falses" y que'l mandatariu nun sufrió nengún atentáu, según la cadena, qu'emite n'inglés. Poco antes, fontes de la Presidencia citaes por Reuters aseguraron qu'Ahmadineyad resultare ilesu tres un atentáu cometíu esti miércoles contra'l convói en que viaxaba na ciudá de Hamadan, nel oeste d'Irán.

Pela so parte, la cadena de televisión Al Arabiya indicó qu'una persona atacare'l convói con una granada de mano na ciudá de Hamadan y resultó de siguíos detenida. Delles persones resultaron firíes, según les citaes fontes.
  
L'atentáu produciríase mientres Ahmadineyad dirixíase dende l'aeropuertu de la ciudá a un estadiu de Hamadan pa dar un discursu ante'l xentíu. Una televisión iranina mostró darréu en directo a Ahmadineyad nel estadiu de Hamadan, aparentemente con bon aspectu y sin facer nenguna mención al atentáu.
  
L'atentáu produciríase dos díes depués de que'l presidente asegurare qu'Israel tenía planes p'asesinalu. L'automóvil que supuestamente sufrió l'ataque treslladaba a dellos periodistes qu'acompañaben a Ahmadineyad, según Al Arabiya.

Contador Estadistiques