El Bloque va falar del conflictu llingüísticu en Bolivia

El miembru de la dirección nacional del Bloque por Asturies, Ignacio González, ta convidáu a poner una conferencia pa explicar el conflictu llingüísticu y cultural d’Asturies en La Paz.

La organización va falar esti miércoles en ‘La Escuela Municipal de les Artes’ de la problemática cultural y llingüística que carez Asturies. La conferencia forma parte del viaxe institucional del miembru de la dirección nacional y responsable de movimientos sociales y formación, Ignacio González, per Chile y Bolivia.

El convite ye de les instituciones bolivianes na ciudá de L’Alto. Esta ye una ciudá apegada a la capital La Paz y que tien una población de más de 1.200.000 persones, de les que más del 80% son falantes de quechua y aimara. Según indiquen dende’l Bloque, l’interés de les instituciones bolivianes ye conocer de primer mano la realidá cultural y llingüística del país ya intercambiar esperiencies.

“Esta ciudá ye conocía a nivel mundial pola fuerza de los sos movimientos sociales na reivindicación de los sos derechos políticos, económicos, sociales y culturales. D’equí surdieron les protestes más grandes que fixeron que dimitiera’l  presidente de la república de Bolivia Sánchez de Lozada nel añu 2003”, señala la formación nacionalista.

Amás d’esta conferencia, el responsable del Bloque sigue cola axenda d’aconceyamientos y contactos con responsables políticos, institucionales, sindicales, universitarios y movimientos sociales de Bolivia depués de facelo estes selmanes atrás colos de Chile.