Los Centros Asturianos de Panamá y Shanghai soliciten l'Asturianía

El Conseyu de Comunidaes Astuianes informó de dos nueves solicitúes de reconocencia d'Asturianía per parte de los Centros Asturianos de Panamá y Shanghai (China).

Los miembros del Conseyu de Comunidaes Asturianes, órganu consultivu y d'asesoramientu de les instituciones asturianes en materia d'emigración, celebraron un Plenu ordinariu nel que, amás de presentar la memoria d'actividaes desarrollaes a lo llargo del añu 2009, informóse de les actuaciones efectuaes pol Conseyu de Comunidaes nel primer semestre del 2010.

Presidíu por Manuel Fernández de la Cera, participaron tamién nel Plenu la Conseyera de Presidencia, Xusticia y Igualdá, María José Ramos Rubiera; la Viceconseyera de Seguridá y Emigración, Teresa Ordiz Asenjo y la Directora de l'Axencia Asturiana d'Emigración, Begoña Serrano Ortega.

Antes del plenu tamién se celebró la xunta ordinaria de la Comisión Delegada del Plenu, na que se trataron dellos asuntos rellacionaos coles actividaes que se vinieron realizando mientres 2010.
    
El Presidente del Conseyu de Comunidaes Asturianes, Manuel Fernández de la Cera, espunxo mientres el Plenu un resume de la memoria de les actividaes desarrollaes coles mires de facilitar que la población emigrante comparta la vida social y cultural del Principáu d'Asturies a lo llargo del añu 2009.
  
En materia de formación, informó sobre'l desarrollu de la III Promoción de la Escuela de Branu d'Asturianía. El so segundu cursu de los trés que tien desarrollóse nel 2008 con un total de 27 participantes procedentes de distintos Centros Asturianos d'América y Europa. Esta promoción acabó esti añu 2010 la so formación col llogru de los correspondientes Diplomes de Monitor.
  
Amás, como estensión de la Escuela d'Asturianía, el Conseyu entamó a lo llargo del añu 2009 cursos de folclore y música tradicional asturiana nos Centros Asturianos de Bilbao, Alcobendas, Castellón, La Rioxa, Alicante, Barcelona, Valladolid, Tres Canto, Vitoria y Madrid. Nel continente americanu los cursos impartiéronse en tres centro d'Arxentina (Bonos Aires, La Plata y Tucumán) y unu en L'Habana.
  
Otra actividá desenvuelta foi la celebración del Día de 'Les Lletres nel Esterior' que, en collaboración cola Dirección Xeneral de Promoción Cultural y Política Llingüística y l'Academia de la Llingua, tuvo llugar nel 2009 nos Centros de Lausana y Berna en  Suiza. Coincidiendo con esta celebración editóse'l llibru "Por partida doble. Poesía Asturiana Actual", que se distribuyó ente tolos Centros y Cases d'Asturies del mundu.
  
Per otra parte, nel 2009, tramitóse la reconocencia d'Asturianía pa los Centros Asturianos de Córdoba, na República Arxentina, y el de San Fernando, en Chile.