Piden a Israel que dexe entrar en Gaza a un equipu d'investigadores

El Comité de Derechos Humanos de Naciones Xuníes convidó a Israel a que llevante'l bloquéu  sobre Gaza, pa permitir la entrada d'un equipu independiente d'investigadores.

Asina, quieren contrastar datos sobre l'asaltu israelín al barcu humanitariu 'Mavi Marmara' del pasáu 31 de mayu, que se cobró la vida de nueve activistes turcos. De la mesma manera, volvióse a pidir a Israel que garantice a los palestinos nos territorios ocupaos los derechos humanos básicos que l'Estáu hebréu comprometióse a protexer cuando firmó nel so día los principales alcuerdos humanitarios internacionales.
  
Los encamientos del comité, que nun son de nenguna manera vinculantes, pretenden elevar la presión sobre Israel pa que dexe que representantes de la comunidá internacional evalúen independientemente los incidentes a bordu del barcu. Según Israel, la planificación del asaltu foi equivocada en dellos aspectos, pero asegura que los sos soldaos actuaron en respuesta al comportamientu violentu de los activistes, qu'usaben cuchiellos y palos.
  
El pasáu 23 de xunetu, otru foru humanitariu de Naciones Xuníes, el Conseyu de Derechos Humanos, anunciaba la creación d'un equipu d'espertos internacionales y pidía la cooperación a toles partes implicaes.
    
L'equipu d'investigación compónse de trés espertos independientes, Sir Desmond de Silva, de Reinu Xuníu; Karl Hudson-Phillips, de Trinidá y Tobago; y Mary Shanti Dairiam, de Malaisia, según un comunicáu de la ONX.
  
De Silva ye un ex fiscal xefe del Tribunal Especial de la ONX pa Sierra Lleona. Hudson-Phillips ye un antiguu xuez nel Tribunal Penal Internacional (TPI) que tamién trabayó como fiscal xeneral de Trinidá y Tobago. Mientres, Shanti Dairiam ye una activista que trabaya en defensa de los derechos de les muyeres en distintos foros de la ONX y asiáticos.
  
El Conseyu votó'l pasáu 2 de xunu realizar una investigación independiente pa examinar lo que calificaba como violaciones del Derechu Internacional nel asaltu israelín, producíu'l pasáu 31 mayu. "L'habilidá, la independencia y la imparcialidá de los miembros de la misión van dedicase a clarificar los socesos que tuvieron llugar esi día, asina como la so llegalidá", aseguró l'embaxador de Tailandia y actual presidente del Conseyu, Sihasak Phuangketkeow.
  
"Pidimos a toles partes que cooperen totalmente cola misión, y esperamos qu'esta misión contribuya a la paz na rexón y a la xusticia pa les víctimes", prosiguió.