Zapatero respeta les competencies de Cataluña pa prohibir los toros

El presidente del Gobiernu  mostró'l so respetu a la decisión de Cataluña de prohibir los toros a partir del 2012 y afaló a nun politizar esta decisión, anque puea tase en desalcuerdu.

"El Gobiernu ye y va ser respetuosu coles competencies de les comunidaes autónomes", aseguró Zapatero na rueda prensa posterior al Conseyu de Ministros, preguntáu por esta cuestión.

Pa Zapatero, el presidente de la Generalitat, José Montilla, emitió una declaración "acertada" pa xustificar el so votu contrariu a prohibir les corríes de toros na so comunidá autónoma n'ares de respetar la llibertá de cada cual y, nesti sen, reconoció la so "coincidencia nesa reflexón".
  
En reconociendo qu'hai persones favorables a los toros y otres contraries, el presidente del Executivu pidió "respetu a toles posiciones" y, sobremanera, "nun politizar too" n'España. "Vamos llegar a un momentu nel que nesti país politízase too", alvirtió.
  
"Pue discrepase d'esa decisión, pero nun se debe politizar", calcó Zapatero sobre la decisión adoptada pol Parlamentu catalán. Anque nun quiso desvelar si'l PSOE va apoyar nel Congresu la propuesta del PP pa que se declaren les corríes como un bien d'interés cultural, aseguró que "el Gobiernu va ser prudente, responsable".