Les cases rurales van tener una ocupación del 63% n'agostu

La ocupación de los agospios rurales d'alquiler íntegru mientres el mes d'agostu nel Principáu d'Asturies van algamar el 63 por cientu, según datos recoyíos por Toprural.com.

Asina, pal próximu mes d'agostu, les cifres provisionales d'ocupación indiquen que, nel conxuntu estatal, va ocupase un 40 por cientu de les places disponibles, y nenguna comunidá autónoma va llegar a la plena ocupación, anque les cuatro comunidaes referíes van superar el 60%.

Respecto al presente mes, la ocupación de los agospios rurales asítiase nel 28% nel conxuntu estatal, lo que representa un descensu de seis puntos porcentuales frente al mesmu mes del 2009, mientres que la previsión d'ocupación del 40% p'agostu supón diez puntos menos que nel añu anterior.
  
Estos datos suponen "una importante cayida" respectu al branu del 2009 que, unida al descensu que sufrió la ocupación del turismu rural nos últimos meses, demuestra un cambiu d'enclín" nos resultaos del sector, que "dexó de ser la modalidá de turismu que meyor aguanta la crisis".
  
Según los datos de les 6.000 cases rurales consultaes pola web, les comunidaes autónomes con mayor ocupación tán nel estremu norte de la Península, y mayoritariamente en zones costeres. Otra manera, los destinos d'interior son los que cuenten con una meyor ocupación, yá que tán más demandaos mientres el restu del añu.
 
OCUPACIÓN EN XUNETU
  
Concretamente, mientres el mes de xunetu la rexón con una mayor ocupación foi Baleares (45%), siguida de Cataluña y Cantabria (ambes con un 43%), Asturies (42%) y Galicia (39%).
  
El director de comunicación de Toprural.com, Joseba Cortazar, considera qu'estos datos "nun son bonos pal sector", pues "a pesar de que les reserves d'última hora tienen cada vez mayor pesu nos resultaos, ye poco probable que se llogre la ocupación d'agostu del 2009".
  
"Los últimos datos confirmen que'l turismu rural yá ta sufriendo les consecuencies de la crisis y qu'esti añu va ser complicáu pal sector", añade Cortazar, qu'apunta como principales causes de la situación a "la falta de marxe de les cases rurales pa xugar colos precios, a diferencia d'otres modalidaes como los hoteles".