El presidente d'ENCE pide que se reconoza'l "valor forestal" del ocalitu

El presidente d'ENCE, Juan Luis Arregui, apostó güei pola reconocencia del "valor forestal" del ocalitu polos recursos de madera que suministra y polos beneficios ambientales.

La empresa española dedicada a la xestión forestal sostenible presentó oficialmente'l Complexu Industrial de Navia, que torna, tres una inversiónn de 257 millones, nel mayor d'España en fabricación de celulosa y xeneración d'enerxía renovable con biomasa. A la presentación asistieron, ente otres personalidaes, el presidente d'Asturies, Vicente Álvarez Areces, y los conseyeros d'Industria, Graciano Torre, y de Mediu Rural, Aurelio Martín, asina como dellos directivos de la compañía.
  
Nel actu, el presidente de Ence, Juan Luis Arregui, apostó pola necesidá de "reconocer sin prexuicios el valor forestal del ocalitu pa suministrar a la sociedá los recursos de madera que precisa con beneficios ambientales y económicos como son la so eficiencia nel usu de l'agua, la so destacada capacidá pa fixar C02 y meyorar los suelos y la so rentabilidá económica".
  
Destacó, per otra parte, la importancia de l'ampliación y modernización de la fábrica de Navia "poles consecuencies positives que tien nel desarrollu del sector forestal y la permanencia de la economía rural asturiana".
  
Arregui calcó na importancia del impulsu coordináu cola Alministración al Plan Forestal d'Asturies y aseguró que'l so papel na ordenación forestal ye "incuestionable" y el so llabor pa promover una xestión activa y tresformadora del ocalitu ye imprescindible".
  
Con estes obres de remodelación, la fábrica dobló les sos capacidaes de producción de celulosa y enerxía y acueye la mayor planta del país de xeneración con biomasa, capaz d'abastecer d'enerxía verde a una ciudá de casi 600.000 habitantes. L'ampliación del complexu ye, según fontes de la compañía, la mayor inversión realizada por Ence y concentró'l 30 por cientu de tolos sos recursos de los últimos diez años.
  
Tres l'ampliación, la fábrica acueye la mayor planta enerxética con biomasa del país, con una potencia instalada de 37 MW, que se sumen a los 40 MW que yá dispón la fábrica d'Ence p'aprovechar tola biomasa residual que resulta de separar la celulosa del restu de componentes de la madera.
  
Ence xestiona de forma sostenible 2.287 hectárees de monte n'Asturies. L'actividá forestal que xenera la compañía nesta comunidá supón 2.300 puestos de trabayu, de los que más de 1.500 tán nel entornu rural.