La Xunta tresllada a Aurelio Martín les sos propuestes de normalización

El pasáu miércoles 27 de xunetu, la Xunta pola Defensa de la Llingua aconceyó col Conseyeru de Mediu Rural y Pesca, Aurelio Martín, pa falar sobre la normalización del asturianu.

Na reunión de siguimientu, la Xunta plantegó-y al Conseyeru la continuación na normalización del asturianu dientro de les competencies, actividaes y campañes de la Conseyería.

D’esta manera, falóse de la profundización del usu asturianu na imaxe corporativa de la Conseyería, la xeneralización na utilización de tola toponimia yá aprobada en tou tipu de documentos, del usu del idioma nes campañes vinientes, del etiquetaxe n'asturianu y de la creación de vínculos estables ente los establecimientos, los productos y la llingua
asturiana.

“Valoramos l'atención del Conseyeru a les propuestes de la Xunta y fadrémos siguimientu conxuntu d'elles”, indiquen dende la organización de reivindicación llingüística.