Sinde destaca la importancia de caltener l'Arte Asturianu

La ministra de Cultura destacó la importancia de coordinase ente les alministraciones central, autonómica y llocal xunto col Arzobispáu d'Uviéu pa caltener l'Arte Asturianu.

"El patrimoniu contién un mensaxe cifráu, embotelláu, que los nuesos antepasaos lláncenmos pa que revisemos nel presente y ayúdemos p'aprender a vivir les nueses vides", afirmó Ángeles González-Sinde,.

Al respecto, resaltó qu'esa reflexón ye "especialmente pertinente" nel casu del Arte Asturianu, que ye "escepcional" por ofrecer una llectura relevante pa l'actualidá, onde hai pequeños conceyos que "debaten sobre usos d'otres cultures" y que garren protagonismu na vida cotidiana pa la convivencia y la integración de les cultures.  
  
"El Prerrománicu asturianu llanza esi mensaxe de la herencia visigoda, bizantina, hispano-musulmana, que se combina colos raigaños llatinos y da llugar a estos bienes que son importantes pa los asturianos, pero tamién pa tolos españoles y tola humanidá", afirma González-Sinde.
  
Asina lo dixo en rueda de prensa, tres firmar col presidente del Principáu d'Asturies, Vicente Álvarez Areces, l'acuerdu del Prerrománicu asturianu al traviés del cual esti añu van destinar una inversión total de 950.060 euros al so caltenimientu, investigación y promoción.
  
En concreto, esti conveniu define de forma detallada, la primer vez, les responsabilidaes nel cuidáu de los monumentos de les partes implicaes, esto ye, el Ministeriu de Cultura, el Gobiernu d'Asturies, l'Arzobispáu d'Uviéu y los conceyos nos que s'asitien les construcciones.
  
Asina, les alministraciones central y autonómica comprométense a promover la investigación, restauración y promoción de los monumentos. Pa ello, la comunidá va dedicar 560.060 euros, procedentes de los Presupuestos Xenerales del Principáu; mientres que'l Ministeriu va invertir 390.000 euros. Pela so parte, l'Arzobispáu y los conceyos asumen desarrollar actuaciones "tendentes a meyorar la situación de los mesmos y de los sos entornos de protección", respectivamente.
  
Esti conveniu, que coincide col 25 aniversariu de la inclusión de los principales monumentos del Arte Asturianu nel llistáu de Patrimoniu Mundial de la Unesco, fírmase dempués de que'l Conseyu de Gobiernu del Principáu autorizare en mayu la firma del acuerdu ente l'alministración autonómica, el Ministeriu de Cultura, l'Arzobispáu y los conceyos d'Uviéu, Colunga, Pravia, Santo Adriano, Les Regueres, L.lena y Villaviciosa.
  
La ministra de Cultura destacó lo breve y cenciello del documentu y "la claridá" na esposición de les responsabilidaes. Amás, indicó que se va constituyir una Comisión de Siguimientu "equilibrada", que se va encargar d'analizar les necesidaes y proponer les actuaciones.
  
González-Sinde calcó, xunto con Areces, en qu'esti acuerdu tien compromisu de "continuidá" y va desarrollase en función de les propuestes de la Comisión.
  
Coles mesmes, el presidente asturianu calcó en que la inversión prevista pa esti añu ye especialmente importante, dau'l contestu económicu actual, polo qu'implica "una xestión realista" y "un compromisu claru" col Arte Asturianu.
  
Tres la firma del conveniu, la titular de Cultura desplazóse pa visitar n'Uviéu los templos de Santa María del Naranco y San Miguel de Lillo, antes de viaxar a Avilés pa comprobar la meyora de los trabayos del Centru Cultural Internacional Óscar Niemeyer, que va abrir les sos puertes a últimos d'esti añu o primeros del qu'entra.