La Escuela d'Asturianía rinde un homenaxe al Gaiteru Lliberdón

Los descendientes d'emigrantes que tán participando na Escuela d'Asturianía treslladáronse a Colunga pa dar un homenaxe a Ramón García Tuero, el Gaiteru Lliberdón.

El grupu, que foi recibíu nel Conceyu pol Alcalde de Colunga, Rogelio Pando Valle, tuvo acompañáu pol Presidente del Conseyu de Comunidaes Asturianes, Manuel Fernández de la Cera, la Directora de l'Axencia Asturiana d'Emigración, Begoña Serrano, y la Directora de la Escuela, Leontina Alonso.

Ramón García Tuero ye unu de los mayores esponentes del folclore musical asturianu y el primer gaiteru asturianu qu'algamó prestixu internacional. Nació en Arroes, Villaviciosa, nel añu 1864 y en 1890 casóse con María Caravera Capellán, vecina de Lliberdón, pasiando'l nome d'esti pueblu por tol mundu.

En 1889 ufiertó un recital musical na Esposición Mundial de París lo cual fixo-y preconocíu. Viaxó por toa España, y tamién per Francia, Alemaña, Italia, Inglaterra, EE XX, México, Puertu Ricu, Cuba, Chile y L’Arxentina. García Tuero participó n'innumberables esposiciones mundiales, como la de Barcelona, Buenos Aires y l'Iberoamericana de Sevilla de 1929.
 
Los actos empezaron con una ufrienda floral nel campusantu de Lliberdón ante la tumba del llexendariu gaiteru, siguiendo na Plaza de Chile del pueblu coles intervenciones  de les autoridaes presentes y les actuaciones de los alumnos de la Escuela d'Asturianía onde baillaron y tocaron la gaita a la memoria del famosu gaiteru. Remataos los actos, los alumnos y alumnes fueron convidaos a sidra y productos de la tierra per parte de la Sociedá Fomentu de Lliberdón.

Esti homenaxe a Ramón Tuero estiéndese tamién a la parroquia de Lliberdón, asina como a la Sociedá de Fomentu de Lliberdón y a les agrupaciones culturales hermanes d'América de Santiago de Chile, Valparaíso, L'Habana y Buenos Aires.

Los actos desenvueltos esta mañana en Colunga formen parte de les actividaes que complementen l'itinerariu formativu de la Escuela de Branu d'Asturianía.  Esta iniciativa ta dirixida a mozos emigrantes asturianos o descendientes d'emigrantes. El Conseyu de Comunidaes Asturianes punxola en marcha nel añu 2002 pa satisfaer la demanda de los Centros Asturianos que reclamaben formación específica, sobremanera en música tradicional y danza.
 
El fin últimu d'esta Escuela ye llograr la cualificación de monitores de cultura y música tradicional asturiana pa que darréu conviértanse en formadores nos sos respectivos Centros. Esisten dos especialidaes, gaita y baille, anque amás d'éstes imparten les siguientes disciplines: Conxuntu Instrumental, Taller de caltenimientu de preseos musicales, Taller de Indumentaria Tradicional, Percusión, Antropoloxía y Llingua, Folclore, Conocencia del Mediu y Cantar Asturianu.

Anguaño celébrase'l tercer cursu de la III Promoción y los Centros Asturianos a los que pertenecen les persones que participen son los siguientes: Santa Fe, Buenos Aires, La Plata, Paraná, Tucumán, y Mendoza (Arxentina); México D.F; Montevideo (Uruguai); Valparaíso y Santiago (Chile); Caracas (Venezuela); Cuba; Sao Paulo (Brasil), Nueva York (EEXX); Lausanne (Suiza); Tres CantoS, Alcobendas, Alcalá de Henares, Castellón, Alicante y Bilbao (España).