González-Sinde firmará un conveniu pal caltenimientu del Arte Asturianu

La ministra de Cultura, González-Sinde, visita esti martes Asturies pa firmar un conveniu de collaboración destináu a meyorar el caltenimientu del Arte Asturianu.

Según informó la Delegación del Gobiernu, a les 11.00 hores González-Sinde y el presidente del Executivu, Vicente Álvarez Areces, van roblar el citáu documentu na sede de la Presidencia.

De siguío, sobre les 12 hores, la titular de Cultura va visitar n'Uviéu los templos de Santa María del Naranco y San Miguel de Lillo, antes de viaxar a Avilés pa comprobar la meyora de los trabayos del Centru Cultural Internacional Óscar Niemeyer, que va abrir les sos puertes a últimos d'esti añu o a primeros del qu'entra.
  
El Conseyu de Gobiernu del Principáu autorizó en mayu la firma del acuerdu ente l'alministración autonómica, el Ministeriu de Cultura, l'Arzobispáu y los conceyos d'Uviéu, Colunga, Pravia, Santo Adriano, Les Regueres, L.lena y Villaviciosa. El testu regula les actuaciones y responsabilidaes que va asumir cada parte en relación col caltenimientu, restauración y espardimientu de los monumentos prerrománicos asturianos.
  
Asina, la Ilesia va encargase del caltenimientu, custodia y atención al públicu de los distintos bienes prerrománicos, mientres que'l Gobiernu d'Asturies va encargase de lo relativo a la investigación, restauración y promoción, en collaboración col Gobiernu d'España. A lo último, los conceyos van responsabilizase de la meyora de los entornos, garantizando la so llimpieza, seguridá y vixilancia.
  
Amás, el Gobiernu d'Asturies asume nesti Conveniu'l compromisu de promover la investigación, restauración y promoción d'estos monumentos, pa lo que va invertir 560.060 euros, procedentes de los Presupuestos Xenerales del Principáu d'Asturies pa esti añu. Pela so parte, el Ministeriu de Cultura comprométese a realizar una inversión de 390.000 euros.
  
Los fondos -casi 1,2 millones d'euros cola aportación de Fomentu- van dir destinaos a trabayos de rehabilitación de los templos de Santo Adriano de Tuñón, San Miguel de Lillo, San Salvador de Valdediós y Santuyano, ente otros.