De la Vega diz que'l Gobiernu "nun comenta nengún actu" d'ETA

María Teresa Fernández de la Vega sorrayó qu'al Executivu central "lo único" que-y interesa ye'l "fin d'ETA", polo que "nun comenta nengún actu" que se refiera a la banda terrorista.

D'esta manera pronuncióse la vicepresidenta primera, a preguntes de los periodistes, sobre l'actu homenaxe celebráu esti fin de selmana na población francesa de Ciboure al etarra Jon Anza.

"A tolos demócrates lo único que mos interesa ye'l fin d'ETA", calcó la vicepresidenta primera, qu'añadio que los etarres "yá saben que nun hai dobles víes nel estáu de derechu, nun hai resquiebres, nun hai atayos, y lo único que-yos espera son llargos años de prisión".
  
Pela so parte, el presidente de la Xunta d'Estremadura, Guillermo Fernández Vara, añadió que" mientres algunos-y faen un homenaxe a los asesinos", otros fáen-ylu "a les víctimes", en referencia a la glorieta qu'hai unos díes inauguró en Villanueva de la Serena (Badajoz) n'homenaxe a les víctimes del terrorismu.
  
El presidente estremeñu y la vicepresidenta del Gobiernu comparecieron xuntos nuna rueda prensa por cuenta de la visita d'esta última a Estremadura.