Fraga alvierte que "Galicia nun ye una nación"

Manuel Fraga apoyó la necesidá de reformar l'Estatutu d'Autonomía gallegu porque "pue y tien que perfeccionase", pero alvirtió "Galicia nun ye una nación".

"Galicia nun ye una nación, nun lo foi nunca", proclamó l'ex presidente de la Xunta y senador pol PP, al sorrayar que forma parte "gloriosa d'España", y reconoció qu'él nin ye nacionalista nin siente "simpatía nenguna polos nacionalistes". Nun almuerzu entamáu pola Tribuna Galicia del Fórum Europa, el que foi presidente gallegu mientres casi 16 años mostróse "partidariu" de "utilizar a fondu l'Estatutu y meyoralu no que seya posible".

En cualquier casu, Manuel Fraga refugó la vía del federalismu pa revisar la estructura del Estáu español y defendió'l modelu d'autonomíes "perfeccionándoles y coordinándoles", pa que "nun les haya de primera y de segunda, sinón que tengan toes el mesmu valor".
  
"Pero que nenguna d'elles se permita plantegar problemes a la unidá d'España", puntualizó al censurar el "pésimu exemplu" dau "por algunos políticos" catalanes, y refirióse, en concreto, al presidente de la Generalitat, José Montilla, del qu'apuntó que "nació n'Andalucía" y "atopó en Cataluña más oportunidaes de les que podía suañar n'Andalucía".
  
Na so opinión, "lo que ta pasando agora mesmo en Cataluña ye mui de llamentar" porque se refuga una sentencia del Tribunal Constitucional al pretender invalidala, "lo cual da marcha atrás en tola organización del Estáu".
 
EL FUTURU DE LES AUTONOMÍES
  
A xuiciu del políticu de Vilalba (Lugo), "el camín son les autonomíes", puesto que son l'equilibriu que-y convién a España y verdaderamente a Galicia", polo que refugó "tornar en federal o casi federal l'Estáu".
  
Al respecto, como ún de los ponentes de la vixente Constitución Española, Fraga calcó en que "l'Estáu ye plural yá" y defendió la vixencia del Estáu de les Autonomíes, que "foi una solución bona". "Decidimos qu'hasta ehí podía llegase y non más", reafirmó.
  
Manuel Fraga tamién se refirió al País Vascu pa destacar los efectos positivos de "la unión de socialistes y populares", frente a nacionalismos que "algunos llevaron la so posición al terrorismu" y pa finxar la "mui poca fuerza" actual de la banda terrorista ETA.