El Bloque pide la nacionalización de les caxes pa garantizar la estabilidá

El Bloque sumóse a ATTAC España y solicitó la nacionalización de les caxes d'aforru yá que "la causa de la cayida económica y la so nula recuperación ye la falta de creitu y financiamientu".

L'agrupación amosóse esti domingu partidaria de que'l Bancu d'España cumpla "ensin demoranza" col so llabor de supervisión ya informe de la situación patrimonial y de solvencia efectiva de la banca privada, a la que tien d'obligar a faer frente a les sos responsabilidaes de saneamientu y reestructuración o intervención.
  
Pal BA ye "imposible que l'Institutu de Creitu Oficial (ICO) asuma'l financiamientu de la economía española, como se pretendió, porque nun dispon de capital nin de medios materiales suficientes pa ello" y les Caxes "pueden desempeñar perfectamente la función de financiar l'actividá económica", siempres que se proceda a saniales convenientemente.
 
Los integrantes del partíu consideren "dafechu inaceptables les propuestes de Fondu Monetariu Internacional y d'otros organismos tendentes a la progresiva privatización de les caxes" al entender que va suponer "arrenunciar a les úniques entidaes financieres que tienen fines d'interés social".
 
"Tampoco pue almitise que la reestructuración de les caxes se llinde a amenorgar la so cuota de mercáu pa que los bancos privaos aumenten la suya y resuelvan asina la descapitalización que sufrieron de resultes de les sos estratexes irresponsables p'aumentar beneficios", reza'l comunicáu.
 
Por tou ello, el Bloque reclama a los grupos iniciatives parllamentaries pa que'l Gobiernu español nacionalice les Caxes y se constituya una Confederación Estatal de Bancos Públicos a partir de les caxes d'aforros y cola misión de garantizar l'imprescindible fluxu de creitu a l'actividá económica.
 
"Ensin perxuiciu de que pudiera llevar a cabu cualesquier otra actividá de financiamientu bancariu, la confederación de bancos públicos asina constituyida taría destinada preferentemente a financiar la puesta en marcha d'un nuevu modelo granible basáu nel desenvolvimientu rexonal, entendíu como'l que fomenta la xeneración y usu sostenible de recursos endógenos", sostien.