Activistes prevén enviar a Gaza dos barcos con bandera española

Los activistes españoles presentes na Flota de la Llibertá anunciaron esti vienres que planien enviar dos barcos con bandera española con ayuda humanitaria a la Faza de Gaza.

L'acción sedrá nel marcu d'una nueva campaña denominada 'Camín de Gaza', cola que van tratar d'esquivar l'embargu al que ta sometíu esti territoriu palestín.
  
Asina lo comunicó Manuel Tapial, miembru de l'Asociación Cultura Paz y Solidaridá y, al par de Laura Arau y David Segarra, ún de los trés españoles qu'esta mañana presentaron una querella na Audiencia Nacional contra'l primer ministru israelín, Benjamin Netanyahu, otros seis miembros del so Gabinete y un altu cargu militar, por delitos de lesa humanidá cometíos el pasáu 31 de mayu, nel asaltu contra'l convói humanitariu n'agües internacionales, qu'acabó con nueve activistes muertos y una decena de firíos.
  
Tapial esplicó que quieren "siguir trabayando na solidaridá col pueblu palestín" y poro tán entamando la nueva campaña, que "pretende sacar dos barcos con bandera española en dirección a Gaza". Sicasí, espresó la so esperanza en qu'estos buques nun tengan que zarpar "porque pa cuando seya posible cayere l'embargu y la población de Gaza puea transitar llibremente y puea exercer la soberanía sobre'l so territoriu".
 
INACCIÓN DEL GOBIERNU ESPAÑOL
  
El cooperante tamién quixo estimar l'apoyu que-yos brindó la sociedá y mostróse convencíu de que "les realidaes cámbiales la sociedá civil". "Nin son los líderes mundiales, nin son los gobiernos", afirmó. Ello ye que llamentó les "non actuaciones" del Gobiernu español nesti asuntu, que calificó de "graves", dao qu'hai trés ciudadanos españoles que fueron "víctimes d'un ataque n'agües internacionales", que cuenta con ingredientes que "daben pie más que de sobra pa que l'Estáu interviniere d'oficiu".
  
Ún de los abogaos que participó na redacción de la querella, Enrique Santiago, denunció que les persones que viaxaben nos barcos de la flota, tanto'l personal civil, como l'humanitariu como "especialmente los periodistes" y los trés activistes españoles, taben "internacionalmente protexíes" y, sicasí, fueron oxetu de "un asaltu violentu con implicación desproporcionada de la fuerza, con execuciones estraxudiciales y con tortures". Delitos que, amás, calcó, realizáronse nel contestu de los crimes de "lesa humanidá y de guerra que se tán realizando contra la población de los territorios palestinos ocupaos".
  
Santiago esplicó que nun principiu la querella, la primera que se presenta en toa Europa, presentóse contra siete ministros del Gobiernu israelín y un altu mandu militar, pero nun refugó que "más palantre, a la vista de la investigación" s'amplíe "contra toes aquelles persones, funcionarios del Gobiernu israelín, civiles o militares, que tuvieren responsabilidá na puesta en marcha d'esti plan militar na execución de delitos mui graves".
   De primeres, la causa podría acoyese al principiu de xurisdicción universal, llendáu ¡mientres la tramitación de la reforma de la Llei Orgánica del Poder Xudicial pa la puesta en marcha de la Nueva Oficina Xudicial, dada la existencia de víctimes españoles y l'ausencia d'una investigación n'otru país.