Frassoni cree que'l BEI nun va financiar la incineradora

La copresidenta de los Verdes Europeos, la eurodiputada Monica Frassoni, desconfía que la incineradora de Coxersa puea algamar financiación del Bancu Européu d'Inversiones.

"Nin siquier se presentó'l proyectu" afirmó. Por ésti y otros motivos, confía en que la UE acepte'l recursu que contra esti proyectu la so formación presentó ante la Comisión de les Comunidaes Europees por Incumplimientu del Derechu Comunitariu.
  
L'alegación presentóla públicamente güei en rueda prensa esti partíu, na que compareció la mesma Frassoni, acompañada de la xurista y conceyal verde nel Conceyu de Mieres, Olga Álvarez García. Na cita, tamién dieron a conocer otros dos recursos presentaos, esta vez ante'l xulgáu de los contenciosu alministrativu d'Uviéu.
  
Pa la eurodiputada italiana "nun se sabe cuál ye'l proyectu nin el costu, polo que ye bien difícil que'l BEI conceda'l creitu". "El BEI nun financia por coses que nun tienen proyectu. La presentación del proyectu tovía nun ta llista y cuando la presenten van tener que responder de manera pública a una serie de cuestiones", que consideró defectos de la iniciativa. "Ye bien difícil que'l BEI puea conceder esti creitu", repitió.
  
Recordó nesti sen que Los Verdes l'añu pasáu llograron "accesu y capacidá d'impactu" sobre los criterios pa dar estos fondos. "Tenemos los medios a nivel européu pa defender esta quexa", adelantó.
  
La falta de financiación ye ún de los motivos polos que la representante europea cree que la UE va almitir el recursu de los verdes. Otru ye "la violación del derechu comunitariu". Señaló la xerarquía establecida na nueva directiva marcu de tratamientu de residuos nel 2008, que nun ye una amistosa suxerencia, sinón vinculante como llei". Nella señálase que la incineración ta "na cuarta posición sobre cinco alternatives posibles". Amás, "cuando se fala de valorización enerxética, fálase d'instalaciones que tengan una capacidá del 60% de recuperación enerxética, polo que va haber que ver si esta incineradora va tener o nun va tener esta capacidá de recuperación". "Si non, va tar tovía más fuera de la llei comunitaria", añadió.
 
INCOMPATIBLE COL RECICLAXE
  
La europarlamentaria negó que la incineradora de Coxersa seya compatible con polítiques comprometíes de reciclaxe. "Si se fai dempués de la puesta en macha de polítiques de recuperación y reciclaxe, l'impactu sobre estes polítiques ye negativu", añadió. Punxo como exemplu'l casu de la so ciudá, Brescia (Italia) que "tien una de les más avanzaes. Antes tenía un 30% de reciclaxe, y agora tien el mesmu, pero'l reciclaxe urbanu ye más baxu", señaló.
  
La incineración "baxa la capacidá de reducción, reciclaxe y recoyida selectiva, y pa tener una rentabilidá económica ha aumentase de forma escomanada la cantidá de residuos pactada", señaló Frassoni. Asina, recordó que na so población acordáronse 150.000 y "agora tamos en 500.000 tonelaes". Pa tener que rentabilizar tiénen qu'importase residuos. "Pa da-y de comer precísense más residuos", matizó, señalando que n'Austria y Alemaña tán importándolos sin tratar d'otres zones, como Nápoles.
  
"N'Alemaña y Austria hai incineración y reciclaxe, porque la construcción d'incineradores empezó antes de les polítiques de reducción y reciclaxe series. En munches rexones hai incineradores que yá nun puen comer porque nun tienen residuos, pero tán amortizaes porque son bien vieyes", acabó.