España caltién la so posición de nun reconocer Kosovu

De la Vega esclaró que l'Executivu "caltién la so posición" de nun reconocer a Kosovu y apostó pola solución dialogada del conflictu" porque "ye l'únicu camín posible".

Asina s'espresó la Vicepresidenta primera na rueda prensa posterior al Conseyu de Ministros, dempués de que'l ministru d'Asuntos Esteriores y de Cooperación, Miguel Angel Moratinos, declarare ayeri que tres la sentencia de la Corte Internacional de Xusticia (CIX), que considera llegal la declaración unillateral d'independencia "ábrese agora una nueva etapa".

"La nuesa posición nun cambió por dos razones. Una, por respetu a la resolución (1244) que compartimos del Conseyu de Seguridá de Naciones Xuníes y dos, atendiendo (...) a los acuerdos fronterizos y de diversidá étnica y cultural que punxeron fin a la guerra de Bosnia", precisó De la Vega.
  
La resolución 1244, aprobada en 1999, establecía una serie de principios xenerales pa la solución política de la crisis de Kosovo y falaba ente otres coses del respetu a la integridá territorial de la entós Yugoslavia, güei Serbia.
  
"Caltenemos la nuesa posición de non reconocencia y siguimos apostando por un acuyerdu ente les partes, pol diálogu", calcó.
  
La vocera del Gobiernu refugó que la sentencia de la CIX puea afalar enfotos soberanistes n'España. Una cosa y otra, dixo, "nun tienen nada que ver", y destacó que ye "mui irreal comparar España colos Balcanes".
  
Recordó que los Balcanes vivieron hai bien pocu "el conflictu bélicu más cruentu", que se produxo n'Europa dempués de la Segunda Guerra Mundial, y que va pasar "a les páxines de la historia más negra" nel Vieyu Continente.
  
Poro, aseguró que "naide con sen de la responsabilidá pue comparar esta situación cola prosperidá que vivimos nel nuesu país y coles normes de convivencia que dimos pal conxuntu de la ciudadanía española".
  
El Gobiernu entiende amás que la sentencia de la CIX nun trata sobre'l derechu d'autodetermín de los pueblos, sinón que se centra puramente nel casu de Kosovu, añadieron fontes gubernamentales.
 
EEXX niega que'l casu Kosovu puea aplicase a Cataluña o País Vascu
 
Estados Xuníos negó que'l vistu bonu de la Corte Internacional de Xusticia (CIX), a Kosovu seya aplicable a otres rexones d'Europa onde existan movimientos nacionalistes.
 
El voceru del Departamentu d'Estáu norteamericanu, Philip Crowley, negó que'l dictame de la CIX seya plicable "a nenguna otra situación" al entruga-y si esta decisión nun podría dar ales a otros movimientos secesionistes como los esistentes en País Vascu o Cataluña.

Hasta afirmó que los servicios xurídicos del so departamentu redactaron un informe que certificaría que la decisión tomada pola CIX esti xueves de considerar adautada a la llegalidá internacional la declaración d'independencia de Kosovu nun ye aplicable a nengún otru casu semeyante.
  
Mientres la rueda prensa, Crowley fixo un llamáu a toos aquellos países que nun reconocieron Kosovu -ente los que ta España- a que lo faigan.
  
Crowley encamentó a Serbia -l'Estáu al que pertenecía Kosovu antes de la so proclamación d'independencia unillateral, y que nun lo reconoz como país soberanu- y a Kosovu, a que "dexen a un llau les sos diferencies (...) y trabayen xuntos de forma constructiva", dao qu'afirmó qu'esti ye'l camín pa meyorar les condiciones de vida de los sos pueblos y integrase dafechu n'Europa.
  
Serbia perdió'l control sobre Kosovu, un territoriu con namás un diez por cientu de población étnicamente serbia, tres la intervención armada de la OTAN en 1999. Tres la guerra, la provincia tuvo alministrada mientres nueve años pola ONU, hasta que nel 2008 Estaos Xuníos, Reinu Uníu, Alemaña, Francia y otros países europeos reconocieron la so independencia y proclamóse un Estáu soberanu.