Abbas diz qu'Al Fatá o s'organiza o los sos díes van tar contaos

El presidente de l'Autoridá Palestina (AP), Mahmud Abbas, alertó al movimientu Al Fatá que lidera que los sos díes tán contaos nun siendo que ponga la so casa n'orde.

Unos comentarios que sorrayen los problemes a los que s'enfrenta'l partíu dende la muerte del so cofundador, Yasir Arafat. La debilidá d'esti movimientu contribuyó al ascensu del Movimientu de Resistencia Islámica (Hamás), que gobierna la Faza de Gaza dende va tres años.
 
Abbas, que reemplazó a Arafat, atacó al partíu pol so fracasu al intentar ponese d'alcuerdu nes candidatures pa les eleiciones llocales previstes pa xunetu pero que tuvieron qu'atayase, dao qu'Al Fatá nun acordó quién se presentaría.
  
"Tenemos que ser responsables polo qu'asocedió", aseguró Abbas mientres la xunta'l pasáu martes del Conseyu Revolucionariu d'Al Fatá, acordies con un responsable qu'asistió. "Si se permite lo qu'asocedió, dígovos qu'esti movimientu tien de dicir adiós", indicó, en comentarios omitíos nuna versión publicada del so discursu.
  
"Esta prueba nun ye una bona traza pa nengún responsable d'Al Fatá, incluyíu yo mesmu", aseguró Abbas. "Nun m'escluyo de la responsabilidá", añadió. A Al Fatá, qu'apoya la idea d'un tratáu de paz permanente con Israel, ganólu Hamás nes últimes elecciones celebraes polos palestinos, nel 2006.
  
La influencia d'Al Fatá llendóse a Cixordania dende que Hamás se ficiere col control de Gaza, per parte de les fuerces lleales a Abbas nel 2007. Hasta en Cixordania, dellos responsables d'Al Fatá tán esmolecíos por que'l movimientu tea en decadencia, y la so credibilidá estropiada pol fracasu de la estratexa d'Abbas al negociar la paz con Israel.