Una sentencia obliga a Navarra a valorar el vascu nes oposiciones

Una sentencia del Tribunal Superior de Xusticia de Navarra (TSXN) señala que’l vascu tien que valorase como méritu nes convocatories d'empléu públicu.

La sentencia del TSXN tien que ver con un concursu pa trabayar nel Serviciu Navarru de Salú-Osasunbidea aprobáu nel 2008 y nel que nun se valoró como méritu la conocencia del vascu.

Pa la parllamentaria de Nafarroa Bai, María Luisa Mangado, el fallu "volvió poner n'evidencia que'l Gobiernu foral discrimina y fai de menos al vascu". Mangado censuró nun comunicáu que'l Gobiernu de Navarra "actúa en contra de la so propia llei del eusquera y busca en toles ocasiones nes que-y ye posible la discriminación y el facer de menos a esta llingua".
   
A xuiciu de Mangado, "la imprudencia y la falta de criteriu d'UPN tien tamién les sos consecuencies práctiques sobre los que participaron na oposición y va conllevar el cambiu de les mesmes llistes y elección de places, lo que supón una falta de respetu terrible sobre los que s'esforzaron por llograr un puestu de trabayu nesta convocatoria".
  
"El Gobiernu de Navarra niégase una y otra vez a cumplir colo que la sociedá, el Parlamentu, y  hasta'l mesmu Defensor del Pueblu reclamen en materia de normalización llingüística. Ye llamentable qu'haya qu'acudir a los tribunales pa qu'UPN cumpla cola so propia llei, yá de por sí insuficiente", destacó.