El Senáu aprueba l'usu de les llingües cooficiales a partir del 2011

El Senáu aprobó cola única oposición de PP y UPN la reforma del so Reglamentu pal usu de les llingües cooficiales nos sos plenos a partir del próximu añu.

Sicasí, la modificación va permitir el so usu namás nel debate de les mociones y non nes sesiones de control al Gobiernu o d'iniciatives lexislatives.
  
La iniciativa salió alantre col apoyu del PSOE, Entesa Catalana del Progrés, CiU, PNV, BNG y tolos senadores del Grupu Mistu, nun siendo la representante d'UPN, María del Mar Caballero. En total, los votos a favor sumaron 134, frente a los 115 que recibió en contra.
  
L'encargáu de defender la reforma foi'l senador de la Entesa Miquel Bofill, qu'entamó la so intervención en catalán y siguió en castellán, p'atacar al PP pol so refugu "pintorescu, pelegrín y poco democráticu" a la iniciativa. "Algunos paez que quieren que la nuesa llingua nun esista y nós nun esistamos como catalanes, gallegos o vascos", aseguró.
  
Na so respuesta, la senadora del PP Rosa Vindel criticó que con esta midida se vaya a "poner torgues" al debate democráticu nel Senáu pese a falar el mesmu idioma tolos sos miembros y preguntóse qué van opinar los parlamentarios europeos al ver a los senadores españoles "debatiendo col 'pinganillo' puestu".
  
El PP considera "incomprensible" que quiera imponese "l'interés d'unos pocos sobre l'interés xeneral", y sostuvo que nun se trata d'una demanda qu'esista na sociedá, a la qu'amás se ta restando la posibilidá de conocer lo que se debata nes Cortes Xenerales.
  
Sicasí, el senador del PSOE José Ignacio Pérez Sáenz refugó que la midida se tate de "un ridículu mundial" o "algo demencial", y recordó que "nun ye nada nuevo", porque'l Senáu yá permitía l'usu de toles llingües na Comisión Xeneral de Comunidaes Autónomes, polo que namás se trata de "una evolución".