Fomentu rescinde'l contratu pal tramu Salas-La Espina de l'A-63

El Ministeriu de Fomentu rescinde'l contratu d'obres pal tramu Salas-La Espina de l'autovía A-63  en virtú de la reprogramación realizada pol axuste presupuestariu.

Nesti momentu, el Ministeriu y les empreses del so grupu caltienen 34 contratos d'obra nueva de más d'un millón d'euros nesta comunidá, de los que se rescinde una, el citáu tramu de l'A-63, que representa un 3 por cientu de los contratos.

Pela so parte, Castiella y Lleón, Cataluña, Cantabria y Aragón axunten venti de los 32 contratos d'obra de ferrocarril y carretera que'l Ministeriu Fomentu va anular en virtú de la reprogramación realizada pol axuste presupuestariu, según la información facilitada nel Congresu pol titular del departamentu, José Blanco.
  
Los proyectos que se van suspender respártense per once comunidaes autónomes. D'ellos, 27 correspuenden a la construcción de distintos tramos d'autovíes y otros cinco a trazaos de ferrocarril d'Alta Velocidá (AVE).
  
Sicasí, mientres una comparecencia ante la Comisión de Fomentu del Congresu, Blanco detalló que n'última instancia les anulaciones de contratos van reducise a 18,  por culpa de que'l Ministeriu prevé volver contratar otros 14, algunos d'elles en collaboración cola iniciativa privada nel marcu del Plan Extraordinadiu d'Infraestructures que prepara'l Ministeriu.
  
Ésti va ser el casu de los cinco proyectos de tren d'Alta Velocidá afectaos, dos tramos de la llinia Valencia-Castellón, y trés de la conexón AVE Palencia-Santander, execución acabante de confirmar el Gobiernu central al de Cantabria.
 
ENTE'L 2% Y 22% DE LOS CONTRATOS
  
Por comunidaes, siete de los proyectos de los que se rescinden tán en Castiella y Lleón, otros cinco en Cataluña, cuatro en Cantabria y otros cuatro n'Aragón. Coles mesmes, trés contratos correspuenden a Andalucía, otros trés a la Comunidá Valenciana, dos más en Galicia y ún a Madrid, Estremadura, Asturies y Murcia, respectivamente.
  
El númberu de proyectos que Fomentu va anular en caúna d'estes rexones representen ente'l 2% y el 22% del total d'obres que'l Ministeriu executa en caún d'estos territorios.
  
No referente a los proyectos de carreteres que s'anulen correspuenden a la construcción de dellos tramos de l'autovía A-32 d'Andalucía; de l'A-21 y la A-23 d'Aragón, de l'A-8 al so pasu per Cantabria, al enllaz de la M-40 cola A-6 en Madrid, y a tramos de l'A-2, l'A-14 y la A-27 en Cataluña. Tamién se rescinden obres de tramos de l'A-56 en Galicia, de l'Autovía del Reguerón de Murcia y de l'A-63 d'Asturies.