TPA va emitir los documentales n’asturianu de la PPP

|

TPA aumenta la so programación n'asturianu col espaciu de documentales ‘Mirasturies, el pasáu recién’, que la cadena autonómica emite los llunes y los vienres a les 9:30.

L’espaciu va allugar los documentales fechos n’asturianu pola Productora de Programes del Principáu lo llargu del so andar, con temes como la hestoria, la naturaleza, el patrimoniu cultural, l'arte, la etnografía y el folclore del país, añadiendo media hora a la programación de la cadena n'asturianu.

La serie documental repasa a lo llargo de 50 capítulos la hestoria d'Asturies n'episodios como ‘Asturies, crónica d’un sieglu’ y ‘Tal como yéramos’; percuerre los espacios naturales y amuesa la flora y la fauna en ‘Árboles y viesques d’Asturies’; ‘Fauna d’Asturies, de les cumes al monte’ y ‘L’osu pardu’, ente otros.

Mirasturies concede una especial atención al patrimoniu históricu-artísticu en ‘La puerta’l cielu’, ‘El Románicu n’Asturies’, ‘Catedral d'Uviéu y Arte Góticu’; y a la cultura popular y a les tradiciones colos capítulos dedicaos a ‘Ferramientes tradicionales’, ‘La forxa del metal’ y los ‘Mercaos tradicionales’.

El programa de TPA ufierta, coles mesmes, un percorríu pol territoriu d'Asturies con ‘Cares, el divín gargüelu’;’ Un paséu per Uviéu’ y ‘Les rutes de Les Xanes y del Navia’ . La gastronomía y los deportes tradicionales como los bolos tienen tamién el so espaciu en Mirasturies.

El programa ye la versión na nuesa llingua de ‘Mirasturias’, programa qu’inclúi documentales de la Productora de Programes del Principáu y qu’entamó la so emisión en 2006, coles primeres tresmisiones de TPA.

Dende la canal autonómica indiquen qu’asina refuercen el so compromisu col espardimientu de la llingua y la cultura asturianes “que l'Ente de Comunicación del Principáu tamién fomenta na programación de RPA y el conteníu del periódicu dixital”.

82 HORES N’ASTURIANU

La televisión pública emitió pola so primer cadena (A7) nel primer trimestre de 2009, 82 hores y 41 minutos de programación n'asturianu.

Dende RTPA, señalen que la ufierta n’asturianu foi creciendo hasta consolidase con programes como ‘Camín de cantares’, una serie documental inspirada nel archivu de la tradición oral y presentáu por Xosé Ambás; ‘Presta Asgaya’, de conteníu infantil y familiar; y los espacios ‘Nós’, ‘Al aldu’, ‘Pieces’ y ‘Sones’.
 

Comentarios

Una pinga d'agua  nun volcan  escandecente,mas non ye .....La RTPA  fai burlla del asutianu, si non respeta la toponimia , de vergoña  ye tou !!
Porque no fai les noticies a una hora n'asturianu!!!! en ve de facerlo nel castellan impuestu.

Contador Estadistiques