L'autopista de la mar con Nantes entama a primeros de setiembre

El delegáu n'España de LD Lines, Carlo Tamagni, esplicó que l'autopista de la mar que va unir Xixón con Nantes (Francia) va tar operativa a primeros del próximu mes de setiembre.

Ofrecerá tres viaxes selmanales en cada puertu y capacidá pa tresportar 120 tráileres y unos 500 coches, amás de la posibilidá de conectar cola ruta a Inglaterra qu'ufierta la mesma naviera. L'aforru en tiempu na conexón con Francia ye de diez hores, mientres qu'en costu económicu asítiase nuna media de 500 euros.

Asina lo anunció mientres la presentación del serviciu na cortil ferial 'Luis Adaro', a la qu'acudieron representantes del sector empresarial y n'especial del de tresportes, y na que nun s'adelantó si podrá podrá establecese una salida diaria en cada puertu. Prevése qu'a mediaos d'agostu tea too llisto de mano les reserves.
  
De momentu, les salíes dende Xixón van tener llugar los martes, xueves y domingu, y dende Nantes los llunes, miércoles y sábados. Coles mesmes, per selmana los barcos van partir a les 21.00 hores,  mientres que'l sábadu va salir de Nantes a les 15.00 hores pa llegar a El Musel a les 5.00 hores del domingu, mientres que de Xixón va partir a Francia a les 15.00 hores d'esi mesmu domingu.
  
Amás, va haber la posibilidá de que col mesmu billete pueda sacase ún que siga hasta Inglaterra, al traviés del serviciu qu'empresta la mesma naviera. Nesti casu, dende Nantes siguiríase'l trayectu en vehículu pa conectar con trés posibles puertos dende onde hai ruta hasta Reinu Uníu. Dende Le Havre, el más cercanu --ente cuatro y seis hores de distancia--, viaxaríase en barcu hasta Portsmouth, de Dieppe a Newhaven, y de Boulogne a Dover. En total hai 12 salíes diaries pa poder conectar a Inglaterra, nun trayectu d'unes dos hores.
  
Tamagni, en respuesta a los periodistes, calcó en que'l barcu ta preparáu non yá pa carga sinón tamién pa pasaxe. Anque tovía nun se sabe'l nome, que se va decidir n'agostu, sí se conoz que la eslora va tar ente 130 y 160 metros.
 
UN AFORRU MEDIU DE 500 EUROS
  
Sobre les ventayes, indicó que l'aforru del viaxe pa un camión dende Madrid a Saint-Nazaire será d'unos 400 euros, mientres que dende El Musel va ser unos 550 euros (sólo dida). Amás, apuntó que nun viaxe per carretera tardaríase unes 24 hores,  mientres qu'en barcu va ser de 14. Por esti motivu, Tamagni destacó que s'ofrez un serviciu seguru, con aforru de tiempu y costos y de cumplir colos descansos axustaos.
  
Al respecto de los precios, el costu por trayectu d'un camión incluyíu conductor va ser de 450 euros, anque si va'l vehículu solu va ser más caru, yá que va haber que movelu. Los usuarios tendrán de tar dos hores antes de la salida del barcu.
  
Nel casu d'un turismu, va costar 100 euros, a lo que va haber que sumar el pasaxe. Los conductores de los camiones van poder dormir en lliteres y el pasaxe priváu va contar con cabines con aséu de cuatro o dos persones. Sicasí, aquel que lo desee va poder pagar un suplementu pa esfrutar individualmente d'un camarote.
  
Los billetes podrán garrase na central de reserves en Francia, con un teléfonu disponible 24 hores, o en cualquier de les dos oficines que van tar abiertes nes terminales de cabecera de la ruta -una en cada puertu--. Les reserves podrán facese tanto per teléfonu como per Internet.
  
Anque tovía nun puen facese reserves, la naviera yá empezó a comercializar el serviciu. Nesti sen, esplicó que caltuvieron una xunta cola Asociación d'Empresarios del Tresporte y Aparcamientos d'Asturies (Asetra) y añadió que'l so presidente, Ovidio de la Roza, tuvo bien receptivu a la ufierta presentada. Tanto n'España como en Francia, l'autopista de la mar ta atopando una bona receptividá per parte de los empresarios.
 
POTENCIACIÓN DE MERCANCÍES Y TURISMU
  
Na presentación participaron amás el presidente de l'Autoridá Portuaria de Xixón, Fernando Menéndez Rexach, el presidente de la Cámara de Comerciu de Xixón, Luis Arias de Velasco y dos representantes de la naviera GLD Atlantique, Stephane Boyer y Jimmy Marolle.
  
Pela so parte, Rexach resaltó l'apuesta de la UE peles autopistes de la mar y lo que va ser la primera que se pon en marcha en Xixón, "pese al escepticismu" de delles persones, tres años dempués de la so aprobación, mientres se ta a la espera de si conceden sovenciones europees pa otros dos, una con Cork (Irlanda) y otra con Rotterdam (Holanda) pa unir con Gdansk (Polonia).
  
Amás de lo que va suponer pal tresporte de mercancíes, con una potenciación no referío a la mercancía xeneral y un impulsu a la futura Zona d'Actividaes Loxístiques y Industriales d'Asturies (Zalia), el presidente portuariu calcó nes oportunidaes qu'abre pal turismu la conexón con Nantes, al tar a unes cuatro hores per carretera con París.
  
Coles mesmes, indicó que va ser un eslabón nun encadenamientu de tráficos y recordó la obligación de les navieres de caltener el serviciu mientres cinco años polo menos. Al concursu presentó la ufierta'l grupu Louis Dreyfus Armateurs y el so sociu italianu Grimaldi, al traviés de la so filial conxunta GLD Atlantique.
  
Pel so llau, Arias de Velasco destacó'l plus de competitividá que va suponer pa les empreses asturianes l'autopista de la mar, especialmente nun momentu económicu "críticu". Pa él, trátase d'una alternativa de tresporte rápida, eficiente y ecolóxicamente sostenible, que pue abrir la puerta a nueves acciones comerciales.