PKK ufre un alcuerdu pa deponer les armes

El líder del Partíu de los Trabayadores del Kurdistán (PKK), Murat Karayilan, afirmó que ta dispuestu a desarmase p'algamar mayores derechos pa los curdos de Turquía.

Karayilan ye'l líder de facto d'esti grupu armáu, dao que'l so principal dirixente, Abdulá Ocalan, ta encarceláu nuna prisión turca.
  
El PKK ta catalogáu como una organización terrorista por Turquía, la XE y Estados Xuníos. Si algamare esti acuerdu, pondríase fin a 26 años de conflictu. La ufierta, declarada por Karayilan mientres una entrevista cola BBC, ye inequívoca. Según el líder del PKK, ordenaría a los sos combatientes que depunxeren les sos armes, baxo la supervisión de la ONX, si Turquía acuerda un altu'l fueu y cumple con delles condiciones.
  
Les sos demandes, prosiguió, inclúin el fin a los ataques contra civiles curdos y los arrestos de políticos curdos nel este de Turquía. El grupu tamién tuvo lluchando por algamar más derechos llingüísticos y culturales pa los curdos que, según les estimaciones, suponen un quintu de la población del país.
  
"Si la cuestión curda se resuelve d'una forma democrática al traviés del diálogu, vamos deponer les armes, sí. Nun vamos llevar armes", aseguró. Pero la so ufierta de paz tuvo acompañada por una amenaza. "Si'l Gobiernu turcu refuga aceptar esto, vamos tener qu'anunciar la independencia", señaló.
  
Un alcuerdu d'altu'l fueu billateral representaría una pasu alantre nel conflictu ente Turquía y el PKK, qu'empezó en 1984 y acabó cola vida de casi 40.000 persones. De momentu, el PKK sigue perpetando atentaos dientro de Turquía dende les sos bases nel Kurdistán iraquín.
  
Mientres los últimos meses, Turquía respondió con ataques aéreos y hasta incursiones terrestres en territoriu iraquín. Anque los dos partes afirmen que namás ataquen a combatientes, cada llau acusa a la otra d'asesinar a civiles.