Asturies acoyerá la entrega del II Premiu Xovellanos

Asturies va acoyer la segunda edición del Premiu Internacional Xovellanos "Resistencia y Llibertá", coincidiendo col segundu centenariu de la muerte del ilustráu xixonés.

La Conseyera de Cultura y Turismu, Mercedes Álvarez González, y el Conseyeru d'Educación y Cultura del Gobiernu de Baleares, Bartomeu Llinàs, informaron güei en rueda de prensa sobre la segunda convocatoria del Premiu Xovellanos "Resistencia y Llibertá", instauráu poles comunidaes autónomes d'Asturies y Baleares pa reconocer los valores cívicos y el compromisu colos derechos humanos.

Según anunció la Conseyera de Cultura, Asturies va acoyer el próximu mes de marzu la entrega del segundu premiu coincidiendo cola conmemoración del segundu centenariu de la muerte del ilustráu xixonés.

Los responsables culturales d'Asturies y Baleares tamién presentaron la publicación que resume de forma detallada la hestoria de la primer convocatoria y recueye la intervención de la primera premiada, l'activista Aminatou Haidar. El xuráu d'esti galardón tuvo formáu polos escritores José Saramago y Barbara Probst Solomon; l'ex Direuctor Xeneral de la UNESCO Federico Mayor Zaragoza; l'ex presidente d'Asturies y escritor Pedro de Silva; el xuez Carlos Castresana; y l'editor y periodista Basilio Baltasar Cifre.

Según indiquen dende la Conseyería, el premiu quier contribuyir a reforzar los venceyos de les comunidaes autónomes d'Asturies y Baleares colos ideales de llibertá, pluralidá y progresu y tien una periodicidad añal.

Amás, indiquen que tamién quieren intensificar la proyeición d'Asturies y Baleares nel esterior, dar un mayor relieve a la figura y l'obra del ilustráu asturianu y reconocer los valores cívicos d'aquellos ciudadanos de cualesquier parte del mundu que sufren persecución o castigu pol so compromisu colos derechos humanos y los valores qu'éstos representen.