Zapatero anuncia que va pidir nuevos esfuerzos a les rentes más altes

Zapatero adelantó que la idea del Executivu ye pidir "nuevos esfuerzos" a los ciudadanos con alta capacidá económica nos Presupuestos Xenerales del Estáu (PXE) del 2011.

"Si hai que pidir nuevos esfuerzos a los españoles voi facelo, voi facelo nos PXE (...). La idea del Gobiernu ye qu'esos esfuerzu van ser p'aquéllos con alta capacidá económica", mostróse tayante Zapateru nel Plenu del Congresu a una entruga del líder del PP, Mariano Rajoy, al que pidió'l so apoyu p'aprobar esta iniciativa.  
  
Rajoy reprochó al presidente'l recorte de la so política social cola rebaxa del sueldu de los funcionarios y la supresión del cheque-bebé, y volvió acusalu de "falsedá". "La so política social resúmese en que cuando llegó al Gobiernu'l paru yera del 10% y agora ye'l doble", cargó.
  
Ante acusación tala, Zapatero recordó que l'Executivu que preside aumentó'l gastu social nun 50% dende que llegó a La Moncloa nel 2004 y congratulóse de facelo "hasta nuna crisis tan grave". "Sí, pidimos esfuerzos a los ciudadanos, especialmente a una parte, pa cumplir con oxetivos d'austeridá y aforru", almitió'l presidente, que reafirmó'l rumbu de la política económica del Gobiernu: "Austeridá y reformes van ser oxetivos de los PXE".
  
A lo último, el líder 'popular' preguntó al presidente si'l Gobiernu va respetar dos resoluciones del Debate sobre l'Estáu de la Nación pa tornar la conxelación de les pensiones nel 2011 y al recorte d'ayudes por fíu a cargu, a lo que Zapatero respondió: "Tengo una misión distinta de la política, si me tien que costar los esfuerzos pa salir de la crisis, algo va costame", afirmó.