Entamen la construcción de la segunda fase del Eólicu de Carondio

EDP Renováveis entamó ayeri la construcción de la segunda fase del so Parque Eólicu de Carondiu nel términu municipal de La Puela Ayande, n'Asturies.

La gran novedá ta en qu'esti parque ta construyéndose treslladando les pales de los aeroxeneradores con helicópteru-grúa, lo que, según los responsables, refléxase nun impactu medioambiental muncho menor que'l métodu habitual de tresportar les pales en camiones hasta cada aeroxenerador.
 
Trátase del primer parque eólicu n'España y el segundu n'Europa qu'utiliza esti novedosu sistema na so construcción, según informó la empresa a Europa Press.
  
El treslláu de les pales ta realizándose en dos fases, la primera tuvo llugar nel mes de xunu, y la segunda qu'empieza güei. El restu del treslláu de los elementos que lu componen va realizase per tresporte habitual terrestre.
  
Les pales trespórtense una a una dende la Campa de Navia, población asitiada a 23 kilómetros del parque en llinia recta. L'helicópteru-grúa, modelu Erickson S-64 y diseñáu pal treslláu d'elementos bien pesaos, ta pilotáu por espertos norteamericanos y, si les condiciones meteorolóxiques son les correctes, pue cumplir el ratio de 18 pales diaries.
  
Les pales son l'elementu más grande del aeroxenerador, dao que nun pue desmontase, polo que'l so tresporte ye más complicáu. Les futures pales del Parque Eólicu de Carondiu van midir 39 metros caúna y van tar compuestes por fibra de vidriu preimpregnáu de resina epoxy, con un pesu de 6.500 kilos caúna.
  
Los aeroxeneradores instalaos nel parque son el modelu G80 de Gamesa, compañía suministradora y encargáu del montaxe de los mesmos. El parque va contar con un total de 25 aeroxeneradores y, cuando tea en fase de funcionamientu, va tener una capacidá eólica instalada de 50 Megavatios.