Una trentena de mozos participen na Escuela de Branu d'Asturianía

Dende güei y hasta 31 de xunetu, 31 mozos emigrantes o descendientes d'emigrantes participen nel segundu cursu de la III Promoción de la Escuela de Branu d'Asturianía.

Na primer sesión d’esta iniciativa formativa que punxo en marcha'l Conseyu de Comunidaes Asturianes nel añu 2002, los alumnos cuntaron coles pallabres de bienvenida del Presidente del Conseyu de Comunidaes Asturianes, Manuel Fernández de la Cera, y cola llección inaugural de Bernardo Fernández, Presidente del Conseyu Consultivu del Principáu d'Asturies, que faló sobre’l sistema políticu alministrativu n'Asturies. Tamién-yos acompañaron la Direutora de l'Axencia Asturiana d'Emigración, Begoña Serrano, y la Directora de la Escuela d'Asturianía, Leontina Alonso.

El fin últimu d'esta Escuela ye llograr la cualificación de monitores de cultura y música tradicional asturiana pa que, darréu, conviértanse en formadores nos sos respeutivos Centros de procedencia. Esisten dos especialidaes, Gaita y Baille, anque amás d'éstes imparten les siguientes disciplines: Conxuntu Instrumental; Taller de caltenimientu de preseos musicales; Taller de Indumentaria Tradicional; Percusión; Antropoloxía y Llingua; Folclore; Conocencia del Mediu, y Cantar Asturianu.

El programa inclúi 300 hores lectives distribuyíes en tres cursos o niveles a realizar n’Asturies nos meses de xunetu. L'actual promoción, 23 mozos procedentes d'América y 8 d'Europa, empezó la so formación en 2008 y terminen anguaño col llogru de la so Diplomatura en Gaita o Baille.

Los Centros Asturianos a los que pertenecen son los siguientes: Santa Fe, Buenos Aires, La Plata, Paraná, Tucumán, y Mendoza (L’Arxentina); Méxicu D.F.; Montevidéu (Uruguai); Valparaísu y Santiagu (Chile); Caraques (Venezuela); Cuba; Sao Paulo (Fray), Nueva York (EE.UU.); Lausanne (Suiza); Tres Cantos, Alcobendas, Alcalá d’Henares, Castellón, Alicante y Bilbao (España).

Los cursos de branu de la Escuela d'Asturianía entamaron pa dar respuesta a una reivindicación práuticamente unánime de toos los Centros Asturianos. La primer promoción, de la que salieron les primeres 20 persones con cualificación pa ser monitores nos sos respeutivos centros, concluyó en 2004. En 2007 cerróse la segunda, con 25 titulaos, lo que suma un total de 45 persones, a les qu'hai que sumar les 31 qu'anguaño tán formándose.

El Conseyu de Comunidaes trata de cubrir tolos pidimientos de formación que solicitaron los Centros Asturianos y pa ello, amás de la mesma Escuela d'Asturianía, entama cursos d'estensión ellí onde esiste demanda. Hasta agora realizáronse cursos en más de 35 centros asturianos de tol mundo, con más de 2.500 asistente.