La CAM non delegará facultaes nel Conseyeru Delegáu de Caxastur

Caxa Mediterraneu aprobó en xunta'l contratu d'integración nel Sistema Institucional de Protección (SIP) que van formar al par de Caxastur, Caxa Estremadura y Caxa Cantabria.

Lo que nun foi aprobáu foi lo que se refier a la delegación de les facultaes nel Conseyeru Delegáu, según un comunicáu unviáu a la Comisión Nacional del Mercáu de Valores.
  
Nesti sentíu, el Conseyu de la caxa valenciana afitó la necesidá de que la soberanía que dexen les caxes "reciba y alministre'l Conseyu d'Alministración del Bancu y, al traviés d'ésti, el Conseyeru Delegáu", según informó la entidá nun comunicáu.
  
Al Conseyu d'Alministración de CAM vióse-y contentu por algamar l'alcuerdu "de forma que les estremaes entidaes qu'integren el SIP puedan ver meyor representaos los sos intereses na entidá que salga".
  
La CAM, Grupu Caxastur, Caxa Estremadura y Caxa Cantabria decidieron el pasáu 24 de mayu crear un SIP que va dar llugar al tercer grupu financieru de caxes d'España y el quintu grupu del sector financieru español, con un volume d'activos superior a los 135.000 millones d'euros y un volume de negociu al rodiu a 160.000 millones d'euros.
  
El protocolu d'integración articúlase como un bancu con sede en Madrid, encargáu de les polítiques de riesgos, tesorería, calificación creiticia, control internu y requerimientos regulatorios de toes elles.
  
Sicasí, cada caxa caltién la so personalidá xurídica, el so allugamientu de negociu minorista, según los sos órganos de gobiernu y obra social independientes.
  
El nuevu grupu financieru de caxes va xuntar unos activos de más de 135.000 millones d'euros, colo que se va convertir na tercer entidá de caxes y la quinta entidá del sector bancariu español. La rede comercial va siguir operando en cada territoriu cola marca actual de cada entidá nel so territoriu natural, de tala forma que Caxa Cantabria, Caxastur, Caxa Mediterraneu, Caxa Estremadura y CCM van caltener les sos insinies.
  
Les entidaes apostaron pola creación d'un SIP pa algamar les ventayes d'una xunta calteniendo la independencia de caúna de les entidaes y la toma de decisiones a nivel local, tanto nel ámbitu del negociu minorista como na obra social.
  
Les entidaes integrantes del grupu asumen un compromisu recíprocu de solvencia, del cien por cien de los recursos propios de cada entidá participante y de lliquidez, pente medies de la creación d'un sistema de tesorería global. El SIP naz con vocación de duración indefinida y les entidaes integrantes van poner de mancomún el cien por cien de les ganancies.