Al Fatá reclama meyores nel diálogu indireutu antes de falar con Israel

Dende'l partíu palestín Al Fatá afirmaron que nun van dialogar de frente colos israelinos mientres nun haya meyores nes conversaciones indireutes, mediaes por Estaos Xuníos.

Pal movimientu d'Abbas, la falta de credibilidá" d'Israel ye'l motivu de que nun se avanzó nel diálogu indireutu, qu'entamaron hai dos meses cola mediación del unviáu d'Estaos Xuníos a Oriente Próximu, George Mitchell.

El primer ministru israelín, Benjamin Netanyahu, caltién la so disposición de falar con Abbas, a'l qu'Estaos Xuníos ta apretando pa que se preste a ello. El presidente palestín, que se va a xuntar esti sábadu con Mitchell, amuesa rocea haza Netanyahu porque cree que nun quier algamar una solución al conflictu que seya aceptable pa los palestinos.
  
A xuiciu d'Al Fatá, la postura d'Israel "va afitase (...) si se pasa a unes negociaciones diretes", diz el comunicáu, nel que se pide a los palestinos que sofiten a los sos dirixentes.
  
Abbas considera que nes negociaciones indireutes tien d'avanzase haza un alcuerdu sobre les fronteres del Estáu que los palestinos quieren establecer al par d'Israel nos territorios que l'Estáu hebréu ocupó na guerra de 1967, tamién sobre les cuestiones de seguridá na solución de los dos Estaos".
  
Nun discursu pronunciáu'l sábadu pasáu, el dirixente palestín sorrayó qu'Israel tien de dexar de construyir nos asentamientos xudíos asitiaos nos territorios ocupaos, pero nun repitió la so esixencia de qu'esti tema quede atayáu como condición pa pasar al diálogu direutu con Netanyahu. El primer ministru israelín aseguró que ta dispuestu a ponese cola cuestión de les colonies en cuando entamen les conversaciones directes