El barcu libiu con ayuda pa Gaza espera n'agües internacionales

El barcu libiu con ayuda humanitaria a Gaza aguarda n'agües internacionales depués de que la Marina israelina alvirtiera de que nun diba dexar qu'atracara.

Según esta fonte, el barcu 'Amalthea', de bandera moldava, atópase n'agües internacionales, a 88 kilómetros d'Exiptu y a 128 kilómetros de la marina de gaza.

Esta afirmación paez afitar el desmentíu de la organización responsable de fletar el barcu, que negó que la embarcación se punxera en camín pal puertu exipciu de l'Arish pa descargar ellí la so carga por cuenta de la presión exercida por Israel.
  
Otru elementu qu'añade tracamundios al destín caberu del barcu ye la emisión dada a conocer por Israel Radio, na que'l capitán del barcu falaba d'una avería nos motores del barcu. "Nun puedo dicite cuántu tiempu va llevar. Nada más teamos preparaos dirételo", podía sentise en dicha grabación.
  
La 'Fundación Internacional Gadafi pa la Caridá y el Desarrolu' encabezada por un de los fíos del dirixente libiu Muamar Gadafi, Youssef Sawani-, ye la responsable del flete del buque, que lleva un total de 2.000 tonelaes d'ayuda humanitaria (comida y medicines) coles que pretende solliviar l'embargu que sufre Gaza por parte del Exércitu israelí.