Xunta de Galicia y Telefónica alcuerden fomentar l’usu del gallegu

El Conseyeru d'Educación gallegu, Jesús Vázquez, el direutor de Telefónica en Galicia y Asturies, Ignacio Ayer, roblaron un alcuerdu pa promover l'usu de la llingua gallega nos móviles.

Asina, Telefónica comprométese a trabayar pa que los teléfonos tengan la opción de menú na llingua de Rosalia. Amás, van promover campañes ente los sos abonaos pa dar a conocer los modelos que yá tienen el gallegu ente les sos opciones.

La compañía tamién va poner les midíes afayadices pa que los usuarios puean comunicase, tanto oralmente como por escritu, nel so idioma. De la mesma, l'alministración va facilitar el sofitu y l'asistencia técnica necesaria sobre los distintos aspeutos del llinguaxe y la terminoloxía, y apurrir cobertoria institucional en cualquier iniciativa de Telefónica que tenga como finalidá la promoción del gallegu.