L'IPC xube en xunu un 0,2%

L'Índiz de Precios de Consumu (IPC) aumentó n'Asturies un 0,2% mientres el pasáu mes de xunu con respectu al mes anterior, de forma que la tasa interañal quedóse nel 1,7%.

A nivel estatal l'IPC xubió tamién un 0,2 por cientu, según los datos facilitaos güei pol Institutu Nacional d'Estadística (INE). Con esta medría, la inflación acumulada asítiase na Comunidá asturiana nel 1 por cientu.
  
El grupu de Bébores alcohóliques y tabacu foi'l qu'esperimentó una mayor xubida, un 5,2 por cientu. Tres del tabacu, Ociu y cultura, con un 0,6 por cientu, la mesma xubida qu'hoteles, cafés y restoranes. Los alimentos y bebíes non alcohóliques pela so parte rexistraron una medría del 0,4 por cientu y la medicina y vivienda un 0,1 por cientu.
  
Los precios baxaron en Vistíu y Calzáu, un 1,2 por cientu; Vivienda, nun 0,8 por cientu, al igual que Tresporte con un -0,2 por cientu. El menaxe y l'enseñanza nun sufrieron variación.

Nel conxuntu estatal, l'IPC xubió dos décimes nel mes de xunu en relación al mes anterior y la tasa interañal asitióse nel 1,5 por cientu, trés décimes inferior a la de mayu. D'esta forma, l'IPC interañal rompió en xunu col enclín a tirase pa riba de los caberos trés meses y baxó hasta'l 1,5 por cientu dempués de gatiar al 1,8 por cientu nel mes de mayu.
  
En valores mensuales, l'IPC xubió en toles comunidaes autónomes, menos en Canaries y en Melilla, onde los precios caltuviéronse estables.
  
El mayor repique mensual de precios llevólu La Rioxa, con un 0,3 por cientu y el menor apuntáronlu Aragón, Castiella y Lleón y Ceuta, con meyores del 0,1 por cientu. Nel restu de comunidaes, Andalucía, Asturies, Baleares, Cantabria, Castiella-La Mancha, Cataluña, Comunidad Valenciana, Estremadura, Galicia, Madrid, Murcia, Navarra y País Vascu, los precios xubieron un 0,2 por cientu en xunu.
  
En tasa interañal los precios xubieron en toles rexones. La ciudá autónoma de Melilla lideró les xubíes al rexistrar un medría del 2,4 por cientu, siguida de Ceuta, un 1,9 por cientu. N'Asturies, Castiella-La Mancha y Cataluña, los precios xubieron un 1,7 por cientu; n'Aragón, Castiella y Lleón y Galicia, un 1,6 por cientu; n'Andalucía, Cantabria, Estremadura, Madrid y Murcia, un 1,5 por cientu; en Baleares, Navarra, País Vascu, La Rioxa, un 1,4 por cientu; na Comunidad Valenciana, un 1,3 por cientu, y en Canaries un 0,8 por cientu.